食燒肉，最緊要就係有靚肉食。之但係燒肉放題嘅話，肉嘅質素通常都比較一般。銅鑼灣新開嘅呢間燒肉放題店就打破大家對燒肉放題嘅諗法，供應4款日本直送嘅靚和牛。而且更設有分店限定嘅午巿燒肉套，同埋喺新張期內贈送指定和牛菜式！牛魔王要度個時間去拜會下了。

銅鑼灣新店佔地約4000呎，裝潢簡約，以淺色木系傢俱呈現日本近代風格，燒肉抽風系統更係特別訂製，燒完成餐都唔使怕好大陣味咁返屋企。餐廳主要引入肉味濃郁、口感軟嫩嘅伊賀牛、油分重嘅姬路牛、脂肪比例均勻、口感清爽嘅宮崎牛，同油花豐富嘅鹿兒島牛，重有美國同澳洲和牛。

 午巿定食：(左) 招牌和牛肉燒肉套餐（黑毛和牛三種類）、(右)一郎拼盤

而為咗照顧附近打工一族，新店特別增設15款平日嘅午巿定食同燒肉套餐，包括招牌和牛肉燒肉套餐（黑毛和牛三種類）三角腹肉、里脊肉、西冷；另外重有豐富嘅一郎拼盤，豬雞牛肉加海鮮都有。

其中，三角腹肉油脂相對較多，食落啖啖甘甜；里脊肉 口感柔軟，西冷嘅肉味則最濃郁，各位肉食獸可以各取所需。

 120分鐘燒肉放題套餐

 小舟盛合

至於大家最關注嘅晚巿120分鐘燒肉放題套餐，則有6款，最平$348起。價錢愈貴嘅，可揀嘅牛肉種類當然都愈多。除咗牛肉之外，每款套餐都會跟一個擺盤靚靚仔仔嘅小舟盛合，包有幾款牛肉、豚肉、雞肉同埋多款海鮮及蔬菜，豐富得嚟重好啱打卡。

 是日寶盒

其中3個套餐更包有是日寶盒，每次去打開寶盒都會有唔同嘅驚喜，例如開飯仔採訪當日，一開盒就飄出一陣仙氣，之後就見到一大塊和牛西冷，面頭重有金箔𠻹！

 (左)燒牛肉火山、(右) 火焰烤西冷

另外，餐廳設有自助區，供應超多款食品同飲品，新鮮沙律丶飲品丶甜點同軟雪糕都係每日無限量供應。喺新張期內，只要全枱完成指定動作，即可獲贈一款限定牛肉菜式。無論係燒牛肉火山定火焰烤西冷，視覺效果都係一流！

和牛燒肉一郎
地址: 銅鑼灣波斯富街24-30號寶漢大廈2樓

文：Kar
相：Wilfred Chui