有時食中菜唔一定要去傳統酒家嘅～銅鑼灣最近就新開一間港式小炒餐廳，主打多款有昔日大排檔風味嘅鑊氣小炒，款款一上枱都香氣撲鼻，而且仲有多款銅鑼灣店嘅限定菜式，啱晒朋友同家人聚會呀。
砂鍋爆胡椒蟹（新店限定）
呢味砂鍋爆胡椒蟹色香味俱全！選用奄仔蟹，蟹肉特別鮮甜而且蟹膏都好香。先將奄仔蟹走油，爆炒原粒胡椒釋放香氣，最後再加入蟹，胡椒香氣好重，食落鹹香又甜。
毛血旺（新店限定）
港式毛血旺，配料超豐富，加入如鴨血、炸午餐肉、牛肉、牛柏葉、魷魚、豆卜、蓮藕及芽菜等食材。辣汁係大廚自家製作，又香又麻，客人如果唔太食得辣都可以揀小辣。
大排檔炸豬手（新店限定）
炸豬手好多時放耐咗個皮會變腍，而餐廳同坊間唔同，用咗整燒腩個方法去做，先蒸熟再醃入味，即叫即炸，所以炸出嚟嘅豬手皮脆又唔油，就算擺落咗都脆卜卜。可以點泰式辣醬或芥末醬食，味道就更多變化喇！
石鍋辣酒螺（新店限定）
選用用大谷酒， 比較香甜及有花香～ 上枱時滾住出，酒同醬汁味道會入晒花螺中，螺肉惹味有酒香。
拔絲咕嚕肉
拔絲咕嚕肉好多人都鍾意食，但要做得好唔係咁易，餐廳選用新鮮梅頭肉，即時走油，入口香脆，而且甜同酸比例啱啱好！
豉汁白鱔煲仔飯
煲仔飯最重要係夠香口！自己用鹹水養白鱔，白鱔處於鹹水環境中身體會縮，所以白鱔口感會脆啲。而個煲仔飯加入豬油，豉油及蔥，真係夠晒香～
鐵板薑蔥焗魚卜
傳統大排檔必食嘅鑊氣小炒，先走油後用薑蔥爆香，入口香脆惹味，每日限定供應，而且為咗保持魚卜口感所以唔做外賣～
地址: 銅鑼灣駱克道405-419號華發大廈地下A號舖
文: Yanica
相: Tom Li