銅鑼灣呢間新開意式雪糕店都幾出位，之前舖頭都未開就大派買一送一優惠券，搞到雪糕迷、甜品控紛紛衝去試食，雪糕幾乎賣清光。原來舖頭有埋自家雪糕工場，日日新鮮即製gelato。同其他雪糕店唔同嘅係，舖頭好闊落，有大約30個座位，仲有少量立食座位添！而且，落地玻璃令自然光線映入店中，令人感覺舒適。

不過最令人舒適就係透過大玻璃，欣賞到雪糕師即席炮製雪糕嘅過程。大部分原材料如牛奶、忌廉、開心果、檸檬等都由意大利進口，再喺店內工場製作，不加防腐劑及人造色素，所以雪糕特別快融化。

主角gelato出場！

店內雪糕吧陳列咗30種不同口味嘅gelato，當中20款係意大利常設口味，例如芒果、椰子、oreo、nutella等等，另外10款就按不同季節而推出嘅亞洲限定口味。

店子推出咗5款特別口味，呢一款更係自家研發出嚟嘅味道，以芒果、椰子、海綿蛋糕、白朱古力碎等組成，食落有多重口感，好豐富，難怪呢款gelato要特別到用舖頭名嚟命名啦！

呢款芥末朱古力味，除咗有黑朱古力又濃又滑嘅質感，仲有少少嗆鼻感，令人好醒神，而且辣度可接受，值得一試。

英式凍餅即係咩？入面有芒果、椰子、黑加侖子、海綿蛋糕及黑朱古力，食落果味好突出，甜度適中。

呢兩款係（左）朱古力雪葩以及（右）橙味呍呢嗱，朱古力雪葩雖然唔太似雪葩，不過朱古力都夠濃郁。

榛子加檸檬薑蜂蜜嘅組合，既有榛子嘅香甜，又有檸檬薑嘅微辛感，好夾。

價錢方面，1球係$40，2球係$60，3球係$70，仲有一款12安士家庭裝添！

除咗gelato，店子亦供應窩夫、乳酪、奶昔、朱古力、咖啡等甜品及飲品。

機械人侍應即將登場！

下星期舖頭即將引入機械人侍應，為客人們介紹各款雪糕口味、自助付款兼玩埋配對小遊戲，無聊時仲可以跳舞娛賓架，超讚！

舖頭新開張無耐，已着手籌備12月推出各款蛋糕，並計劃出年年頭會喺九龍區開分店添，認真多搞作！

3 Italiani
地址：銅鑼灣謝斐道535號 Tower 535 地下3號舖

文：Joy