銅鑼灣希慎廣場中庭多咗間茶飲店，白色主調加上以狼做Logo夠搶鏡。原來係本地品牌，精選台灣同日本等地嘅優質茶葉，而且口味多變。有容易入口嘅水果茶，近年大熱嘅奶蓋茶，特別珍貴嘅冰滴茶，同賣相似足啤酒嘅氮氣茶，保證大家搵到你嘅Cup of tea。
 

茶狼特別挑選嚟自福岡、阿里山、四川等地嘅茶葉，配合唔同創新泡茶手法。咁茶同狼又有咩關係呢？原來係想以狼耐心等待最佳時機捕獵嘅特性，嚟形容品牌用時間同心機萃取茶葉嘅精髓。茶飲店雖然無座位，不過角落有個小吧枱，仲有唔同造型嘅茶狼出現，畀大家打卡呃Like。
 

水果鮮甘蔗青茶 （冷）（$38）

招牌之一就係呢杯足料水果茶，裡面有士多啤梨、蘋果、檸檬、青檬、西瓜、熱情果、橙同四季柑共八種水果。入口先飲到水果、特別係熱情果嘅清新味道，之後有甘蔗甜味，最後有一絲青茶幽香，層次分明 。飲完茶記得食埋水果呀。
 

紅柚白露茉莉茶 （冷）（$36）

另一推介係橙紅色嘅紅柚茶，杯邊放上紅柚切片望落特別吸引。飲落柚子嘅酸同獨特嘅少少澀味同茉莉茶非常夾，甜度比水果茶低，而且果肉都幾多，夠哂Refreshing。
 

鮮甘蔗奶蓋青茶（冷）（$32）

奶蓋係用咗紐西蘭忌廉芝士、法國海鹽、優質淡奶及煉奶現場鮮打，口感Creamy而且濃稠度適中，唔會過厚搶走茶香。一開始先飲到芝士鹹香，再到甘蔗青茶嘅甘甜，兩種味道層次分明又互相配合。
 

N2氮氣茶 - 白露茉莉茶（冷）（$28）

氮氣茶意指喺茶之中灌入氮氣，斟出嚟嘅時候茶面會有一層細緻嘅氣泡，唔講真係會以為係啤酒嚟。茶當中都有氣泡，飲落嘅口感無汽水嘅氣泡感，反而比一般嘅茶更柔滑。茉莉茶花香唔算突出，味道清爽帶悠長回甘。

（右）冰滴茶 - 日本八女茶玉露茶+白露茉莉茶（冷）（$48）

用扁身玻璃樽裝住嘅冰滴茶，顧名思義用冰塊滴漏嘅方式萃取茶葉當中嘅甘香精髓，平均1.5秒一滴，所以一樽就要等4個鐘！聞落帶茉莉幽香，入口順喉，味道一開始帶少少苦但餘韻清甜自然。最啱鍾意品嘗茶香原味嘅Tea Lover，不過注意冰滴需時，每日限量供應。
 

（左）冷泡台灣高山凍頂烏龍茶（冷）（$26）、（右）冷泡叁時茉莉茶（冷）（$22）

另外亦有原包茶葉冷泡嘅樽裝純茶，用室溫約25度冷泡8個鐘，同樣有減低苦澀度而提升回甘嘅效果。高山凍頂烏龍茶入口帶烘焙香味，茶香亦更濃厚，餘韻甘潤。

叁時茉莉茶顧名思義即係用咗下晝三點採摘嘅茉莉花，亦係一日當中質量最好嘅時候。淡淡優雅茶香帶起綠茶嘅清爽味道。
 

烏龍布丁杯（$26）

除咗茶飲之外亦有甜品，包括焗芝士蛋糕同3.6牛乳芝士布丁杯。當中最特別就要數到呢個烏龍布丁杯，口感Creamy綿密，味道似烏龍奶茶，甜甜地帶烏龍茶清香，當飯後甜品或者下午茶茶點就最啱。
 

最後溫馨提示一下大家，茶屋係期間限定店，即日起營業至3月21日。飲品可以自選甜度（正常、少量、微量、無糖）同冰量（正常、少冰、無冰），而除咗N2氮氣茶同冰滴茶之外其他茶飲都可以轉為熱飲。以後去銅鑼灣行街，又多一間茶飲店可以揀啦。

茶狼 Cha Long
銅鑼灣軒尼詩道500號希慎廣場1樓中庭

文、相、片：Cathy