酒鬼福音呀！銅鑼灣有間酒店開咗間日本酒吧，有超過100款嘅果酒、梅酒、燒酎、吟釀同獨家品牌等選擇，而重點係，呢間係一間任！飲！放！題！吧！

喺日本興咗一段時間嘅任飲放題吧，終於由著茗唎酒師Randy引入嚟香港，成為香港首間日本酒放題吧。幾個酒櫃放滿咗逾100支酒，並以顏色牌仔分類，橙色係較啱女生飲嘅清甜果酒、藍色係吟釀而綠色嘅係燒酹。酒吧採全自助形式，客人揀啱邊支，就可以自己拎出嚟，自己斟埋，飲完再揀，再斟，限時內無限暢飲。唔好話一大支幾錢，就算平時出去飲杯sake閒閒地都幾十一百蚊，而家最平$98就可以任試咁多款，成件事好chill好開心。

不過我都明望住過百款嘅選擇係幾難揀嘅，仲要好多都係坊間少見，甚至係獨家發售同代理嘅，唔係飲開有研究嘅都未必識，不過唔緊要，唎酒師Randy每日都會駐場，可以隨時為大家介紹各款靚酒！以下呢幾款都係推介必試之選啦（戴個頭盔先，酒吧成日都會換酒款，未必次次去都見到啊）。

先介紹幾支吟釀同大吟釀。清酒嘅等級主要按精米步合嚟到劃分，50%以下嘅可歸入大吟釀，磨過嘅白米去走容易產生雜味嘅蛋白質同脂肪後，剩低中心嘅澱粉質，香氣更重。真澄 Yawaraka Type 1呢支純米吟釀， 55%精米步合 ，酒體相對薄身輕柔，而且帶有陣陣甜身米香，幾易入口。

另一款都比較甜身嘅係亀泉純米吟釀原酒，用上高知縣嘅CEL-24酵母，非常fruity，蜜瓜、香蕉等味突出，女生大可一試。

至於男生，應該會對作 雅乃智 中取酒感興趣。除咗因為呢支係50%精米步合嘅純米大吟釀 ，入口先係果香再以微辛作結外，主要係佢個名啊！佢個日本名，係同機動戰士渣古同音啊！

玉乃光 純米吟釀 94 串則係一款比較Dry身嘅清酒，嚟自京都傳統清酒大廠，見到樽身成串串燒喺度，就知道呢支最啱拎嚟配串燒鳥！濃香中帶酸感，各方面嘅平衡都做得幾好。

講到特別嘢，就非鶴見酒造蜜蜂酒 燒酹莫屬喇，唔止label上有隻蜜蜂，樽底仲要有兩隻真‧虎頭蜂！生產自愛知縣，偏乾身而帶微微蜂蜜甜，又一隻幾好飲而唔覺得原來係25度嘅酒！

而真澄粕取燒酒 SUMI 25，係以自家酒粕做嘅燒酎， 所以味道更清純亦更清甜，富酒香。

喺各式各樣，好似士多啤梨呀菠蘿呀桃呀等果酒中，有隻大家應該比較少試過嘅，係天吹酒造血橙梅酒。釀製時加入意大利血橙，仲有向日葵同六合花等酵母，血紅嘅顏色相當搶眼，口感清爽，酸酸澀澀咁好啱夏天飲！

由6月1號起，更會聯同人氣日本酒專門店KURAND打響頭炮，合辦pop up 店，帶嚟多款特色日本酒，好似Anco紅豆乳酪酒、三芳菊酒造MatCheese、南瓜味嘅冷壓清酒等等……

當然，齋飲好dry嘅，呢度都有多款佐酒小食、串燒甚至pizza同丼飯等畀大家可以邊食邊飲，鹹香嘅牛舌串燒用嚟送頭先介紹嘅玉乃光 純米吟釀 94 串就啱晒。另外仲有汁燒原條魷魚、枝豆等等亦係送酒恩物！

 限定特色酒款

放題詳情
價錢：$98/半小時、$188/一小時、$368/兩小時

Wako Sake Bar
地址：灣仔摩理臣山道23號南洋酒店2樓
優先訂飛按此

文、相、片：Kar