各位雞翼控就位喇，銅鑼灣開咗有一間專食炸雞翼嘅小店Wing It!，獨沽一味專心做雞翼！美籍店主Chris話，美國有好多雞翼專門店，有連鎖亦有小店，咁多選擇所以美國老麥係冇雞翼賣架。反而香港每間餐廳都一定有賣雞翼，但專門店就冇，所以就決定開一間只賣雞翼嘅食店。店名Wing It! 意思都有試新事嘅意思，襯返成間舖嘅concept！
炸雞翼有original同crispy兩款，crispy比原味多咗一層薄薄炸漿，更加脆身。所有雞翼選用巴西貨，已預先醃好，先炸一次，有柯打時再即叫炸多一次，保持香脆熱辣。
雞翼本身味淡，不過呢度有個醬汁吧，俾你無限混醬！Chris稱美式重口味未必啱香港人，不如客人自己mix and match，揀自己鍾意嘅口味啦。現時有18款醬汁及調味粉，8成都係自家調製，而且每星期都有新醬汁，唔會食到厭。
推介醬汁包括Wing It Baffalo，比一般水牛雞翼淡但香甜。照燒汁就香甜帶薑味，青芥辣沙律醬帶少少芥辣味，都幾刺激。不過最有驚喜反而係辣花生醬，醬汁較杰身，但花生味好突出，原來同雞肉都幾夾喎。蒜頭蛋黃醬、蜜糖芥末都好受歡迎，識得食梗係mix埋，傳統水牛加藍芝士加沙律醬就係最美式口味喇！
無論鍾意食雞翼定鍾意食醬，都一定好滿足！外賣只可以揀一款醬汁，堂食任落任試開心好多。
地址：銅鑼灣禮頓道106-126號禮信大廈地下3號舖
更多新店直擊： |
文、相、片：Perrins