成日去啲鐵板燒餐廳，見住呀師傅燒到好似表演咁都覺得好型棍好OP！而家你都有機會喇！尖沙咀有間新開嘅鐵板燒餐廳，可以自己燒添呀~~ yo ho~ 睇我表演喇！

每張枱頭都有個鐵板燒爐，實行人人都可以做「大廚」！可以燒嘅嘢不外乎都係牛肉或者海鮮，侍應會講解返每款食物應該點燒同燒幾耐，仲有埋個timer提供，應該冇問題嘅。

牛魔王記得要揀日本A5和牛肉眼厚燒，真係好厚好大塊呀，心心眼咗！肉質鮮嫩，脂肪適中，配埋乾蒜食就更加香口。

海鮮嚟講，一人前餐就包晒虎蝦、北海道原隻帆立貝同銀鱈魚，全部都好鮮甜，加埋餐廳特製嘅牛油——製作時加入埋蕃茜同香蒜——呢種預先加入調味料入牛油嘅做法，令到鹹香味道分佈均勻之外，既惹味亦有助吊出鮮味。

另外仲有得燒御好燒，同樣都係預備好晒材料，客人可以自行製作，輕輕燒一燒過啲豚肉之後，連同帆立貝、蝦仁、魷魚、豚肉、餅糊漿一齊攪勻，每面燒5分鐘左右，加埋醬油同蛋黃醬、紫菜粉、木魚絲等就大功告成，幾乎可以話係零失敗呀！

飯後點少得甜品？日式厚班戟，倒漿、冚蓋、計時、翻兩翻，再加啲芒果、忌廉上去就搞掂，幾個步驟仔唔會難倒你哋啦~

 巨峰提子活乳酸梳打

不過，如果對自己（或者你朋友仔）冇乜信心嘅話，其實可以請返師傅代燒都OK嘅，但講真，自己落手落腳燒下笑下，就算fail咗，都幾開心。

花見•幸福
地址：尖沙咀厚福街8號H8 11樓全層

 文、相：Kar