大排檔小炒以即叫即炒為主，大牌檔師傅會將食材放係火爐嘅鑊上，拋起拋落，係分秒之間利用猛火昇華食物嘅味道，烹調出「有鑊氣」嘅菜式，讓食客享受到熱辣辣又色、香、味、形俱全嘅大排檔小炒！
金牌源記大排檔 (深水埗)
現今香港大牌檔因爲唔再發牌同傳承問題，少一間就無一間，所以正宗港味嘅鐵皮屋鑊氣小炒買少見少，想體驗翻50,60年代嘅正統大排檔就要嚟依到啦！源記保留大排檔特色，廚房都係街邊，食客可以睇住師傅即場煮，一煮完即刻品嚐鑊氣小炒！
源記小炒王
蝦乾，銀魚仔，魷魚 等等材料炒到鹹鹹香香，加上鑊氣十足，用來送啤酒冇得頂！
脆皮炸大腸
大腸去除咗部份脂肪，炸到香脆又唔會太乾，真係少啲功夫都唔得，再點埋甜酸醬一齊食，有助去除油膩感！
菠蘿生炒骨
一道色、香、味俱全嘅生炒排骨，好睇又好食，排骨咬落仲皮脆肉嫩，酸酸甜甜，有果香，正呀！
蜜椒薯仔牛柳粒
充滿大排檔風味，勁有鑊氣！青椒紅椒炒到香噴噴，薯仔皮脆餡軟，牛柳粒甜而不膩！
源記海鮮小廚 (荃灣)
荃灣嘅二坡坊出名多高質鑊氣小菜食，而源記就以潮州海鮮打冷小菜為主，除咗食物質素高外，老闆更會每個月第一個星期日為65歲以上長者提供免費飯盒，希望回饋社會，絕對係良心食肆！
非常精緻嘅菜式，嫩滑嘅莧菜加上斑球、蝦球、素翅同瑤柱熬製而成嘅汁，再加埋蟹子，口感同鮮味都十足！
秘製辣子雞
一上枱就香氣十足！師傅用上花椒油、指天椒同秘製香辣醬炒炸到酥脆嘅雞肉，香而不辣，鍾意食辣嘅朋友仲可以加辣加麻，絕對滿足到想食火辣辣大排檔風味嘅您！
牛柳粒食落入味又唔會韌，薯仔面頭夠乾身，內裏夠滑，每啖都滿口甜蜜蜜，係必食菜式之一！
*以上圖片只供參考，所有食品以實物為準. 食品供應因餐廳而異
相、文：Tiffany