暫時未飛到去日本仙台都可以瘋狂食牛舌！最近喺網上牛舌關注組受到組員追捧嘅，就係深水埗呢間主打牛舌嘅日本餐廳。將牛舌分為牛舌芯、牛舌尖、牛舌筋同牛舌底，每個部位都用唔同處理同烹調方法帶出特色，部分更以鐵板熱辣辣上枱，香氣十足！
 

細分為牛舌芯/尖/筋 口感大不同

「牛舌專門店 Gyu Town」位於深水埗，睇餐廳名就知主打牛舌，比起一般燒肉店只有厚切同薄切，呢度係將牛舌分為唔同部位，分別配搭唔同食材做出多款食法。當中牛舌芯係當中最為軟嫩，簡單加鹽、黑椒、蒜粉生煎至七成熟，粉嫩多汁！而牛舌尖比較有嚼勁，會先用秘製醬汁炆煮再煎，香口同時更易咬。牛舌筋係牛舌後段帶筋嘅肉，因此餐廳會切成粒狀，用日本味醂、特製醬油等炆煮約兩個鐘，令其入味軟腍。
 

招牌三重牛舌御重盒 食齊三款牛舌滋味

三重牛舌御重盒（原價$133，31/10/2022或之前新張優惠價$113），轉套餐（+$18）

想試晒牛舌三個唔同部位嘅肉質同特色，當然要點招牌三重牛舌御重盒。由左至右分別係爽口多汁又帶脂香嘅牛舌芯、炆至入味軟腍嘅牛舌筋、爽口彈牙肉味濃郁嘅牛舌尖，無論邊款都好啱送飯啊！可以加$18轉為套餐，會有沙律、湯、汽水，湯係味道清甜嘅牛舌洋蔥湯，食到粒粒牛舌底㗎。
 

日本惠比壽雞扒配牛舌尖御重盒（$83），轉套餐（+$18）

如果覺得全部都係牛舌有啲寡，亦可以選擇配搭牛、豬或雞肉。呢份就選用日本直送嘅惠比壽雞扒，呢種雞喺位於宮崎嘅雞舍中放養約55日，特色為雞肉嫩滑多汁、味道鮮甜，雞扒煎過後皮脆肉滑，同樣香口。
 

300°C鐵板上枱！自行燒至理想熟度

鐵板香蔥薄燒牛舌芯（$118），轉套餐（+$28）

鐵板系列係餐廳最受歡迎嘅種類，牛舌會先由師傅燒至半熟，再放喺300°C鐵板嘅上面，由客人自行按喜好燒至理想熟度，保證熱辣辣又香噴噴！好似呢份鐵板香蔥薄燒牛舌芯，用爽中帶嫩嘅牛舌芯捲起蔥花同炸蒜，非常惹味。鐵板可配燒肉汁、日式牛排汁或者英式芥末。
 

鐵板伊比利亞梅頭配牛舌尖（$98），轉套餐升級至滿溢牛舌筋溫泉蛋丼（+$38）

牛舌尖亦可以配搭伊比利亞梅頭，肉質鬆化而且油脂甘香，師傅會將梅頭先煎至約七成熟，打卡後建議先趁鐵板夠熱嘅時候切開再煎香啊。
 

滿溢牛舌筋溫泉蛋丼（+$38）

鐵板系列本身嘅套餐係配白飯，牛舌控可以再加$10升級至牛舌筋溫泉蛋丼，煮過嘅牛舌筋同牛舌底粒粒堆到成座小山丘咁，多到就嚟睇唔到啲飯！
 

特別推介 和洋風牛舌漢堡

牛舌筋漢堡（$78，31/10/2022或之前新張優惠價$68），轉套餐（+$18）

除咗日式丼飯同鐵板系列之外，亦有西日合璧嘅牛舌筋漢堡！用味道香濃嘅煮牛舌筋作為主角，配搭芝士、洋蔥、生菜等，當中畫龍點睛嘅係漬物赤椰菜，係餐廳自家醃漬約兩個星期，爽脆帶酸，可以一解油膩感。
 

滿溢薄燒牛舌日本溫泉蛋丼（$88），轉套餐（+$18）

薄燒牛舌尖鋪到滿出碗邊，名副其實係滿溢！牛舌加上加上牛舌汁同溫泉蛋，食落更為香甜滑溜，簡單灑上蔥花同芝麻提香，又係一款白飯殺手。
 

滑蛋蕃茄二重牛舌筋丼（$78），轉套餐（+$18）

呢碗丼飯就選擇用牛舌筋配搭蕃茄汁同炒滑蛋，蕃茄汁係餐廳用新鮮蕃茄、洋蔥、香料、茄膏等煮成，蕃茄味突出，酸甜開胃。
 

辣椒麵豉

漬物赤椰菜之外，餐廳亦有自家醃漬嘅辣椒麵豉，可以解油膩。
 

牛舌專門店

地址：深水埗桂林街46B號地舖

文：Cathy.H
相：Michael