去茶餐廳食早餐或下午茶，沙嗲牛麵都係熱門選擇，更有網民開設關注組，推介心水選擇畀大家，即睇邊幾間係熱話之選啦～
好好運快餐店
被網民稱為「世一沙嗲牛」、「沙嗲牛麵天花板」嘅茶餐廳，日前回歸重新營業，吸引唔少fans朝聖。肉牛分量足，沙嗲汁有濃厚花生味，亦有花生碎，水準同以前差唔多，想將碗麵升級嘅話，不妨加配紅腸。
圖：新大利粉麵茶餐廳
大圍區有2間推介，「新大利」同「大利」個名好相似，而前者雖然開業時間相對較較，但幾多人推介。佢嘅沙嗲牛麵湯色深，但味道唔算極濃，牛肉就有口感之餘亦容易咬開。
圖：小肥豬扒餐廳
大圍另一間推介～曾有網民指佢嘅沙嗲牛最接近世一好好運嘅味道，雖然花生味冇咁明顯，但沙嗲味突出，都吸引唔少朋友一試。不過根據餐廳名嘅話，豬扒先係鎮店主角，嚟到記得試埋呀～
圖：百寶茶檔
少有用鐵碗上麵嘅茶餐廳，佢嘅沙嗲汁混入蝦皮、花生碎，風味幾出。有網民指呢度最出名嘅其實係雪菜豬扒，亦有試過點沙嗲牛麵老闆送雪菜，夠晒特別。另外呢度嘅麵款相對有特色，好似坊間少見嘅客家鹹香魷魚麵就可以喺度食到喇。
圖：文：Cathy
