嚟緊星期日係咩日子？唔准諗，即刻答！各位孝順仔女實記得係母親節嘅，是咪已經訂好餐廳同媽媽去食母親節大餐先？咁揀咗母親節蛋糕未？以下呢幾款蛋糕，又心心又花花又粉色系，全部都可以幫媽媽瞬間重拾少女心。溫提一下，揀啱嘅話最好3日前訂定啊。

酥皮初心  酥妃皇后

由前歌手黄寶欣開設，以全人手製作酥皮蛋撻為主打嘅餅店，推出咗幾款酥皮芝士雙層蛋糕，包括有開心果栗子、咖啡伯爵等口味，其中呢個心形嘅紅莓酥皮芝士雙層蛋糕，則以新鮮紅莓製成果泥，混合澳洲忌廉芝士烘焗。啖啖都有濃郁芝士同野莓嘅清香，酥皮層亦貫徹地鬆脆，口感豐富。

食得嘅曲奇花束   Sift Patisserie

如果母親節諗住送紥花畀媽媽嘅，可以考慮下呢紥Sweet Tulip曲奇花喎，睇得仲食得，以新鮮奶油製作，應該畀到新鮮感媽媽。呢間現代法式餅店另一款蛋糕，Rosehip Cheesecake以牛油曲奇做餅底，芝士慕絲中間夾有荔枝果凍同紅莓碎，仲有玫瑰花同朱古力做裝飾，都幾靚。

精品糖雕蛋糕  Ms B’s CAKERY

有邊個媽媽唔鍾意收花吖？呢間餅店嘅蛋糕推出咗6款主題蛋糕，全部都係「花」心思製作，配上花藝糖雕裝飾，實氹到媽媽心花怒放。True Love以清新嘅忌廉同接骨木花雪芳蛋糕配襯荔枝慕絲同脆脆餅底，而GRANDEUR一套三色（紫紅﹑粉紅、淺黃）嘅4吋微型蛋糕則係香梨、焦糖忌廉雪芳蛋糕，味道清香。

華麗修女泡芙　DALLOYAU

修女泡芙可以話係呢間法式餅店嘅皇牌，趁住母親節，「修女」一個華麗轉身，換上粉紅新裝，由幼滑微酸嘅紅桑子忌廉所製；而士多啤梨雪芳蛋糕雖然望落好多cream，但係係特製嘅輕忌廉嚟，感覺輕盈，加上甜甜fer新鮮士多啤梨同士多啤梨果醬，媽媽唔使怕膩但就實甜到漏。

后冠蛋糕  美心西餅

地位如女皇嘅媽媽，當然襯返個后冠蛋糕啦。呢個士多啤梨蛋糕係噴沙面，上面有個朱古力后冠圍住好多士多啤梨同藍莓，底層係感覺高貴嘅紅絲絨蛋糕，同樣夾住士多啤梨果肉同雜莓啫喱。

型格黑蛋糕　　Twinkle Baker Décor

一向以造型取勝嘅呢間cake shop，特地為各位母親大大設計咗幾款蛋糕，呢個以竹炭粉噴面仲灑上金箔嘅黑色玫瑰蛋糕，送畀行型格路線嘅潮媽就啱晒。內裡夾層係黑芝麻mousse同黑芝麻醬配朱古力海綿蛋糕；至於貪靚媽媽就可以揀呢款香水形嘅蛋糕畀佢，漸變色好鬼靚，最啱媽媽打卡用。

火烈鳥蛋糕　聖安娜餅屋

Flamingo唔一定係後生女嘅專利嚟，媽咪級一樣都可以有少女心！呢間餅店推出咗一系列粉紅色火烈鳥主題嘅蛋糕，其中最有睇頭嘅應該係兩層高嘅幸福花園喇。有大大隻火烈鳥朱古力牌之餘仲有大大朵朱古力花喺頂頭。兩層蛋糕則係忌廉雜果蛋糕，兼有夾心脆層。

文：Kar
相、片：Kar、Yanica