香港其實集合咗唔少國際美食，嚟緊8月將會有一間飲食集團舉辦餐廳週，大家就可以去旗下18間餐廳，以低至$98試到期間限定嘅Tasting Menu！部分仲係平時不設訂座嘅人氣食肆。今次開飯仔就去咗當中4間，幫大家親身睇下有幾抵。
 

Black Sheep Restaurants於8月6號至12號，舉辦首屆「黑羊 ‧ 美饌」餐廳週，食客可以上活動網站，預定旗下18間分佈喺中環蘭桂坊、Soho區、灣仔同尖沙咀嘅特色餐廳。午市套餐$98起，晚市套餐最平$144/位！
 

超豐富泰國風味菜　Soul Food Thai

午市套餐（$98/位）

天時暑熱，想開胃點少得酸辣醒神嘅泰國菜？呢間餐廳主打泰國唔同地方嘅特色菜，而且今次活動嘅Tasting Menu相當豐富，包括小食泰南咖喱角、香辣青木瓜沙律、軟殼蟹炒金邊粉同雞肉青咖喱兩道主菜，最後仲有椰子雪糕做甜品！
 

軟殼蟹炒金邊粉

椰子雪糕

軟殼蟹炒金邊粉有原隻軟殼蟹上枱，配合埋金邊粉、豆腐、豆芽、雞蛋、醃蘿蔔同自家調配嘅醬汁，辣中帶酸。雞肉青咖喱味道更辣，同時帶新鮮椰漿香。最後嘅椰子雪糕味道微甜，加上鹽味椰糖焦糖同花生碎之後，味道同口感層次都更豐富。
 

中東迷必試黎巴嫩菜　Maison Libanaise

午市套餐（烤雞肉串）（$98/位）

黎巴嫩菜其實有咩食？不妨就趁呢個機會嚟呢間以60年代黎巴嫩首都貝魯特大宅為靈感，三層樓高嘅餐廳一試。午市套餐包括中東菜常見嘅鷹嘴豆泥、茄子沾醬、黎巴嫩醃菜、焗皮塔餅、自選燒烤美食同自選配菜，相當豐富。
 

午市套餐（烤羊肉串）（$98/位）

自選燒烤美食首推烤羊肉串，無羊膻味之餘，口感嫩滑帶多香果粉香味。配菜可以選擇香料飯或者敍利亞沙律，前者加入綠扁豆、香料、洋蔥、炒杏仁，相當香口，後者喺生菜、番茄、蘿蔔、洋蔥當中加入中東綜合香料同鹽膚木香料，惹味而清爽。
 

 
新鮮拿坡里薄餅　Motorino

午餐（$98/位）

Pizza嘅發源地就係意大利拿坡里，而呢間就係主打正宗拿坡里Pizza嘅餐廳。特點係選用最新鮮嘅食材，而且以真正使用木材嘅烤箱烤製Pizza。而午市套餐比較簡單，包括特色沙律同自選薄餅。
 

晚餐（$288/兩位）

而晚市套餐可選兩款薄餅，配有氣紅葡萄酒一支同Tiramisu！而且晚餐Pizza選擇多達11款，建議大家時間許可嘅話可以嚟試晚餐。餐廳招牌Pizza係意大利辣肉腸，另外蘑菇肉腸充滿菇菌香同時又唔太膩，都係推介口味。
 

馬球主題阿根廷扒房　Buenos Aires Polo Club

慢烤特級黑安格斯牛肋扒（午餐$148/位）

以馬球呢項貴族運動為裝修主題，唔少人可能都會以為呢間扒房消費好高。而家機會嚟喇！午市套餐包沙律吧、是日餐湯、慢烤特級黑安格斯牛肋扒、香烤蔬菜、時令水果配是日精選甜品都係$148/位！平時單係沙律吧加是日餐湯就要$198/位，計起嚟係咪即刻覺得抵好多呢？
 

參與「黑羊 ‧ 美饌」餐廳週嘅仲包括今年入選亞洲 50 大最佳餐廳嘅新派法式餐廳BELON、今年最優秀開飯法國菜餐廳La Vache!、摩登印度菜館New Punjab Club、新派廣東餐廳口利福等。
 

「黑羊 ‧ 美饌」餐廳週
活動日期：2018年8月6日至12日
完整參與餐廳名單及網上訂座： www.blacksheeprestaurants.com/blackseries （7月23日11:00起）
^必須網上訂座

文、相、片：Cathy