要數近期最有睇頭嘅下午茶，開飯仔肯定推介呢間尖東酒店新出嘅西瓜主題tea buffet，主題夠新穎，而且仲可以食到早排hit爆全城嘅西瓜蛋糕，唔知酒店出品又如何呢？

Tea buffet選擇多多，前菜沙律、壽司、中式點心、粥品、甜品糖水、飲品等夾夾埋埋都有超過100款美食，而大部分用嘅西瓜係來自日本、韓國、台灣，小食有甜有鹹，都幾特別。

全場最有亮點嘅，就係呢個西瓜士多啤梨蛋糕。究竟點樣可以將濕潤又多汁嘅西瓜放入蛋糕？甜品師教路，西瓜容易出水，所以要先用西瓜汁、西瓜肉、檸檬汁製成西瓜啫喱，中間再以士多啤梨慕絲定型，面層再鋪滿韓國士多啤梨而成。

喺鬆脆嘅忌廉泡夫之中放入原塊西瓜片，再唧上西瓜慕絲。而且忌廉泡夫外層仲多一朕抹茶脆皮，令整個甜品造型猶如一粒小西瓜，好cute。口感層次豐富。

晶瑩剔透嘅西瓜啫喱香草牛奶凍，製作過程都幾繁複，先用真‧西瓜皮盛載，然後每隔兩個鐘頭，倒一層西瓜啫喱，再倒一層香草奶凍。味道既爽甜，又夠奶香，好balance。

（左）西瓜雜莓撻以吉士撻做底，再加埋西瓜球及黑白朱古力片，賣相雅緻。而（右）西瓜甜品杯上面有西瓜粒同薄荷粒，下面有口感溫和嘅63% Valrhona朱古力忌廉，肯定一眾choco迷。

另有西瓜味軟雪糕，師傅真係將西瓜蓉混合日本北海道3.4牛乳，西瓜味好fresh，味道唔假，亦唔死甜。旁邊仲有8款toppings以及4款醬汁畀客人自行添加。

甜點以外，開飯仔較為好奇以西瓜做出嘅鹹點，例如有菲達芝士做配菜嘅西瓜伴香辣豬肉腸、好醒胃嘅西瓜番茄凍湯伴開心果仁等，西瓜味道雖然偏淡，不太食得出有西瓜味，但整體味道都不俗。

材料多多嘅（左）西瓜、番茄、香桃醬伴墨西哥脆片，以橄欖油去煮西瓜、番茄、芹菜、芫荽及洋蔥，好香，配埋香脆嘅墨西哥脆片，口感一流。而（右）香煎塞浦路斯芝士伴西瓜，芝士面層燒得金黃色，仲有少少焦脆感，配清爽嘅西瓜，味道好有層次。

順帶一提，除咗西瓜軟雪糕，仲有Häagen-Dazs雪糕架！

除咗以西瓜做成嘅小食，其他都幾唔錯架，壽司有成5-6款選擇，有三文魚壽司、腐竹卷、八爪魚壽司等等，好啱鍾意食日本菜嘅香港人。

肉食方面，雖然無即切牛扒，但都有呢款同樣肉感非常嘅火腿。

香草醬配魚扒、炸薯波。

客人可自敲朱古力，敲出心水嘅朱古力分量，食得又玩得。

飲品方面有兩款free-flow特飲，飲品會不時轉款，採訪當日為菠蘿汁、西瓜特飲。

西瓜主題下午茶自助餐
供應日期：即日起至6月30日
供應時間：逢星期六、日及公眾假期1pm-5pm
價錢：成人$338/位、小童$268/位

大堂酒廊
地址：尖沙咀麼地道64號九龍香格里拉大酒店大堂

文：Joy