有時出街食中菜食得多，都會想有啲新鮮感，今次介紹4間創意中菜館畀大家，包你一定有驚喜！

兩代米芝蓮星級廚師聯手打造 志

由擁有45年入廚經驗、於米芝蓮二星餐廳營致會館掌舵嘅蕭顯志師傅同埋喺知名米芝蓮星級餐廳工作逾十年嘅主廚李韋傑（Oliver Li）聯手打造嘅現代粵菜餐廳，菜單以無限創意、令人耳目一新嘅方式重新演繹經典粵菜。高湯燉甲魚凍，甲魚於上湯中以低溫炆燉12小時，底部以煙燻雲南竹筍、芹菜同牛奶製成，最後加上魚子醬為菜式增添一點鮮味。茅台貴妃竹絲雞亦係一道功夫菜，先將烏雞浸泡喺以金華火腿、蝦米同瑤柱製成嘅上湯中烹煮，風乾一天一夜後再以高溫油炸，雞皮金黃香脆，雞肉鮮嫩多汁。

香港本地特色菜 壹玖捌叁  

一向致力融合傳統中菜同創新詮譯於一身嘅中菜館～最近佢哋推出全新嘅單點菜式同點心，推介菜式包括採用鮮拆花蟹肉嘅三重滋味焗迷你蟹蓋，可以一次過食到麻辣、大閘蟹粉同芝士煙肉三種唔同風味，好特別。另有富士蘋果黃燈籠辣椒醬蒸黃花魚，富士蘋果同微辣嘅自家製黃燈籠椒醬意外地和諧。點心方面有翡翠帶子餃配炸乾瑤柱、自家製特級乾瑤柱油，加上新鮮帶子、菠菜同脆炸乾瑤柱，軟糯鮮甜之餘又帶點香脆口感。

香港新派粵菜先鋒 口利福  

圖：7eating

極具個性嘅創意中菜餐廳，餐廳名喺廣東話中帶有「好運」嘅意思，因為獨特嘅菜式吸引唔少人食～餐廳嘅設計充滿街頭藝術風格，為食客營造出一種活力四射嘅氛圍。炭火蜜汁黑豚叉燒超香炭火味，叉燒鹹甜適中，軟腍入味好出色。啫啫無骨辣雞煲伴紅洋蔥芫荽煎腸粉都好特別，煎腸粉吸晒雞煲嘅汁好惹味。甜品斑蘭花生醬西多士配煙燻楓糖漿、烤椰絲同椰子意式雪糕，入口有淡淡斑蘭香，配埋椰子雪糕食就一流！

山珍瑰寶盛宴 The Chinese Library  

位於大館內嘅創意中菜廳，今季推出全新菜單，嚴選十款當造嘅山珍菇菌，包括鮮松茸、野竹笙、雞油菌、羊肚菌同埋稀有嘅荔枝菌等配搭時令海鮮。必試有呢款鮮松茸雲霧帶子燉花膠，松茸加入雞湯同花膠精心燉製6小時，湯底味道更見清甜。香酥雪燕阿拉斯加蟹盒內餡包括鮮甜爽嫩嘅羊肚菌、彈牙嘅雪燕、鮮甜嘅阿拉斯加蟹肉同埋鹹香嘅諾鄧火腿等，味道超豐富。另外唔可以錯過限量嘅自家泡酸蘿蔔煮海黃花．手打烏冬，湯底用上五斤鯽魚熬煮半小時，加薑解膩去腥使湯底更加鮮甜。溫馨一提菜式由即日起至10月21日供應。

文: Yanica