香港最近開咗幾間本土嘅蒸餾廠，製作屬於香港人嘅氈酒。其中一間座落喺柴灣嘅工廈內，呢間仲係全港第1間開放式蒸餾廠，可以畀公眾入內參觀！

Two Moons由兩個好鍾意飲gin酒，鍾意到要去英國學製氈再返嚟開廠嘅八十後創辦。酒廠面積大約1000平方呎，推門入內尚算寬敞，仲有張吧枱可以邊品嚐手工氈酒、邊同蒸餾師交流。開關一著，更可以隔住玻璃見到整座蒸餾嘅設備，了解蒸餾過程。

蒸餾廠引入量身訂造，以純紅銅手工打造而成嘅德國銅壺式蒸餾器，紅銅可以將蒸餾過程中產生嘅雜質同異味去除，為咗酒嘅質素，負責人表示貴啲都要選用。呢部蒸餾器細細部，每日經過5-6個鐘嘅蒸餾過程後，可以生產到100瓶。蒸餾過程以外，好多工序都係人手處理，好似貼標籤、啤樽等等。

暫時佢哋就只係得Signature Dry Gin一款乾氈酒，不過已經足夠醉倒一眾酒鬼。呢支氈酒使用超過10種草本植物製作，包括主力令整杯酒聞落感覺清新嘅新鮮檸檬皮同乾玫瑰花瓣。另外仲有陳皮、粉紅胡椒、雲呢嗱豆荚、杜松子、芫荽籽、綠豆蔻等等嚟自世界各地嘅植物品種，令到氈酒層次複雜，味道鮮明。

大部分人對gin嘅印象都係要加埋tonic咁飲，gin & tonic嘛。但呢款gin酒可以獨立飲用，而且仲充滿驚喜。入口先有一陣清新感，然後慢慢有少少甜甜地，再迅速散發出辛辣感，最尾嚟返少少回甘，餘韻頗長，口感順滑，唔講唔覺酒精度逾40%㗎。

當然都可以好似傳統咁，加埋tonic一齊飲嘅。但原本豐富嘅口感就會沖淡咗咯。

有興趣想認識更多蒸餾過程同手工氈酒文化嘅朋友，仲可以預約參觀蒸餾廠呢~ 農曆新年後就會開始有tour啦。另外喺唔少酒商同酒吧度都可以搵到呢支Two Moons Signature Dry Gin嘅蹤影啦~ 包括：Liquor and Liqueue、The Bottle Shop、Caviar House & Prunier、Ping Pong 129 Gintoneria、001 Bar、The Envoy、Ori-gin、Room 309等。

Two Moons Distillery
地址：柴灣吉勝街8號吉勝大廈9A
官網 (按此)

文、相、片：Kar