唔少人都係芋圓fans，貪佢煙煙韌韌夠好咬，重可以有唔同嘅配搭～今期搵咗幾間芋圓甜品畀大家，有過江龍亦有小店，各有特色～

台灣過江龍芋圓甜品店 清原

圖：咩都食一餐

來自台灣、主打芋泥嘅茶飲及甜品店～嚴選來自屏東同大甲嘅芋頭，務求一年四季都能供應最好嘅芋頭畀大家品嚐。招牌芋圓為保持彈潤口感，必須冷熱交替沖水幾次，無添加色素同防腐劑，只有濃郁甘甜嘅芋頭同地瓜香氣。除咗芋泥飲品，亦有芋頭冰、雪花冰、仙草冰等，以及暖湯系列。其中人氣No.1芋見幸福包括紅豆、芋圓、芋頭球、西米同珍珠，食完一定大滿足！

愛文芒甘露芋圓 芋圓一 

圖：Raindybabe

於西環重新出發嘅芋圓小店，招牌手工芋圓係店主每日新鮮製作，有芋圓、番薯圓同紫薯圓3款，芋圓真係食到芋粒，真材實料。必食傳統仙草芋圓，大大碗有齊仙草、芋圓、珍珠、紅豆、白玉同薏米，黑糖汁湯底好清甜；如果想更加芋，可以食芋香仙草芋圓，用咗每日用新鮮芋泥打成嘅湯底，芋頭味勁香濃～另外重供應好多唔同嘅配搭，如愛文芒甘露芋圓、桃膠雪燕窩清心丸芋圓、黑糖薑汁湯圓芋圓等。

酒釀桂花配芋圓 康瑞甜品

圖：foodmarker.hk

深水埗人氣甜品店，餐牌選擇唔多，幾乎個個都係為咗特色仙草搭配而嚟。粒粒芋圓由人手搓成，煙煙韌韌好有嚼勁，芋頭同番薯味道好突出，唔係淨係得個顏色；配埋仙草、珍珠、薏米等材料，夠晒飽肚。酒釀桂花配芋圓都好有特色，帶有淡淡酒香，配合桂花同蛋花令成碗糖水好滑，加埋芋圓增添口感，想食清啲嘅芋圓糖水可以考慮呢款呀。

招牌包心三色芋圓仔 圓仔記 

圖：vanessafoodiary

主打低糖健康配方嘅芋圓專門店，芋圓於工場每日新鮮製作，以木薯粉取代較難消化嘅糯米粉，而且選用口感夠粉嘅新鮮芋頭；而紫薯圓會盡量用日本紫薯製作。招牌包心三色芋圓有齊三色芋圓、芋泥球同地瓜包心芋泥球，地瓜包心芋泥球外皮係煙韌嘅番薯圓，內餡就係綿滑芋泥，好出色！另外為咗迎合港人口味推出茶茶芋圓，有伯爵茶、焙茶同綠茶味，想有新鮮感嘅朋友可以試吓。

文：Yanica
編：Cathy