想食正宗西班牙菜？歐美國家真係唔係話飛就飛到，但其實香港都有唔少出色嘅西班牙餐廳，可以體驗地道風味！
26年歷史西班牙菜館 Ole Spanish Restaurant 
圖：食都食窮我
屹立中環雪廠街超過20年嘅西班牙餐廳，可以話係香港第一代嘅西班牙餐館！嚟食西班牙菜當然要食Tapas啦，推介叫一個西班牙風乾火腿同番茄蓉麵包，將塊ham放上麵包度食真係好夾～食完蒜蓉欖油海蝦，啲油都要留返嚟蘸包食。主菜推介塞哥維亞式烤乳豬，外皮超香脆，肉質軟腍又充滿油香；火焰燒西班牙八爪魚及烤蔬菜都唔錯，八爪魚質感好爽又夠鮮味。
必食紅蝦熱狗 Pica Pica
圖：joyceclt
一間現代西班牙小食酒吧，店名嘅意思係「這點一些、那些一點」，希望客人可以享受多款傳統精緻嘅西班牙小食。招牌紅蝦熱狗麵包好重牛油香，蝦肉係超鮮甜，建議將蝦頭嘅膏唧埋落麵包度食呀。和牛他他都值得試，將生牛肉鋪喺牛骨髓上面好吸睛，和牛好軟腍又惹味；鵝肝都係人氣之選，入口即化，好香油脂感。
異國風情樓上西班牙菜 La Paloma
圖：位於西環嘅樓上西班牙菜，幾適合多人聚會㗎～前菜方面推介吞拿魚他他配墨汁海鮮飯脆脆，同埋西班牙風味烤三文治配芝士、伊比利亞火腿同黑松露，前者非常開胃，赤身冇筋好鮮甜；後者酥脆焦香。西班牙海鮮飯都係必食，海鮮飯有魷魚、蜆肉、青口、蝦等配料，飯粒粒粒分明，飽滿帶點焦香，味道鮮甜，仲有雙拼選擇，好貼心！
超濃郁鮮味龍蝦飯 Chueca
圖：joyceclt
中環歌賦街一間好摩登嘅西班牙菜，藍金色拱門好吸睛。Tapas有呢款Chef’s Rusa，係薯仔吞拿魚蓉沙律配三文魚籽，creamy又鹹香，搽上脆餅好夾！必食係招牌紅蝦西班牙飯，紅蝦肉質鮮甜爽口，米飯粒粒分明有咬口，醬汁濃郁，蝦膏香氣十足；有時餐廳亦會供應龍蝦西班牙飯，啖啖都係龍蝦鮮味。甜品方面Flan de Nata值得一試，好重Vanillia同奶香，口感又夠滑。
文：Yanica
編：Cathy
