豉油雞可以話係經典嘅中式小菜，雖然成日都可以食到，但要搵到好味嘅豉油雞都唔容易！

目錄

觀塘抵食之選 秋意  

圖: littlefoodie00

觀塘咁多好選擇，佢能夠成為觀塘打工仔嘅人氣飯堂就知唔簡單～招牌去骨豉油雞用玫瑰豉油上色，睇落顏色好深，但食落味道啱啱好，入味又唔會太鹹，豉油甜甜地，送飯一流呀，肉質都好嫩滑。佢午市只係$62，仲配埋流心蛋同沙律菜，亦可以自選配白飯或湯麵。湯麵嘅湯底係用雞湯熬出嚟，好鮮味～

$42豉油雞皇牌套餐 雞味濃

圖: onichan1105

主打食雞嘅餐廳，招牌係佢哋嘅蒜香蔥爆霸王雞，但原味頭抽豉油雞都一樣咁好食！原味頭抽豉油雞皇牌套餐，一份有齊豉油雞、無味精老火湯、新鮮油菜、白飯或菜飯或麵，仲有蔥油同菜脯，都只係$42咋，好有誠意。豉油雞色澤好吸引，頭抽同雞嘅香氣好突出，肉質方面都好滑，雞嘅份量夠多，下面嘅芽菜索曬甜甜地嘅豉油，冇得輸！

獨特浸雞手法 歡喜樓

圖: 博士

位於元朗村屋嘅餐廳，雖然隔涉啲但仍然唔少人慕名而去㗎。金牌頭抽豉油雞香濃而不過鹹，大廚加入自家製薑汁去腥，加上用埋獨特手法去浸雞令到雞肉熟之餘內外都咁嫩滑。佢嘅浸雞豉油有冰糖嘅清甜同埋陣陣玫瑰露嘅酒香，入味之餘仍保留到雞味，難怪唔少明星都係席上客。

住家豉油雞 食得好

圖: 為食MoJil

以手工粵菜為主打嘅中菜，豉油雞好有住家味道，一上枱就知隻雞靚仔，上色好靚隻雞又飽滿～甜豉油嘅味道都好好，據講佢哋嘅調味就只有豉油及冰糖兩種，豉油雞唔係浸煮而成，而係將自家調製嘅豉油不斷咁淋到雞肉上，無間斷咁淋足半小時，所以特別入味，真係功夫菜呀～雞皮吸收晒豉油汁，非常滑溜入味，仲帶少許脂肪，出色！

文: Yanica