高級餓鬼係乜？就係一班鍾意性價比高，追求有質素有味道嘅放題控。尖沙咀呢間新開餐廳就啱晒呢班人嘅胃口喇，除咗有刺身壽司串燒炸物甜品呢啲基本嘢，仲有任拎任食嘅即開生蠔、即煮廚房、真正嘅純鮮榨橙汁等等，水準絕對拍得住酒店級數，快速睇！

放題3大特色！

1. 手機WeChat落單

入座後，客人先用電話掃瞄一下枱上嘅QR code，進入餐廳嘅WeChat公眾號，再掃瞄入座紙上嘅指定QR code，就進入落柯打嘅頁面，點選心水食物，好方便。

2. 每位送龍蝦

每位客人都跟送原隻龍蝦，龍蝦大約400-500克重，有時會係美國波士頓龍蝦或印度青龍蝦等等，視乎季節、質量而定。至於烹調方法，客人會有3款選擇，例如芝士焗龍蝦、蒜蓉牛油焗龍蝦、海膽黃金燒龍蝦、明太子醬燒龍蝦等。

呢款海膽黃金燒龍蝦要花好多工夫去煮，要將日本馬糞海膽及蛋黃製成汁，需要用篩子多番擠壓，重覆又重覆先完成。放喺龍蝦上面去燒製而成。如此金黃，就睇得出用嘅海膽分量肯定好多先做到。香濃嘅海膽汁，配以彈牙嘅龍蝦肉，好味！

3. 即煮廚房

餐廳仲有兩個即煮廚房，即席為客人烹調出新鮮又熱辣辣嘅食物。一邊係炒菜吧，餐廳特別搵嚟中菜師傅，炒出鑊氣十足嘅小菜。有白菜仔、西蘭花、唐生菜及翠玉瓜4款選擇，再配清炒、蒜蓉炒、薑汁炒、XO醬及魚湯煮5種煮法。聽落似乎普通，但負責人話好多客人都鍾意，炒菜吧嘅菜經常煮到缺貨添！

可以睇到師傅即席拋鑊嘅功架，勁！

即炒即食嘅鑊氣小菜，特別好味啲！

另一邊係即煮意粉，每晚會有3款意粉畀客人揀，款式仲不時轉換。採訪當晚有：卡邦尼扁意粉、南瓜忌廉帶子扁意粉及香草拿破崙扁意粉。

開飯仔就揀咗南瓜忌廉帶子扁意粉，先用配料炒香，再依次加入意粉、忌廉、南瓜汁，煮至收汁就可以上碟啦！

扁意粉掛汁力強，而且帶子鮮甜，食完成個人暖番晒！

雖然餐廳有近百樣食物任你揀，但餓鬼都有食飽嘅一刻，所以開飯仔精選咗10樣必食items，有回本嘢有新鮮有自家創作，畀各位參考番。

1. 即開生蠔

一入餐廳門口就見到好搶眼嘅生蠔吧，師傅不斷開蠔、洗蠔，refill速度都幾快。採用嘅係來自日本嘅鳴瀨生蠔，蠔肉肥美，海水味濃。有檸檬、美國tobasco辣椒仔、日式青檸酸汁、莎莎醬、生蠔醬、蒔蘿香草汁及紅酒香醋7款調味料，咁多選擇都唔知揀邊款好喇！

2. 高質刺身

放題必有嘅刺身，有三文魚、吞拿魚、深海池魚、甜蝦、帶子、赤貝、八爪魚、油甘魚及希靈魚10款，刺身以外仲有壽司架，較為特別嘅有大分油甘魚，以柚子胡椒醬調味，味道好清新，期間限定至有架，想食就要速速落柯打！

三文魚仲切得好厚身，表層有一層閃令令嘅油光，更覺新鮮；赤貝口感爽脆，食多啲都唔怕膩。

3. 創作壽司卷物

除咗以上壽司，餐廳師傅亦炮製咗好幾款自家創作嘅壽司及卷物，有別於一般壽司嘅做法，賣相吸引之餘仲有啲新派嘅fusion味道，例如醉碎金迷、縱橫四海、鰻魚蘋果、挪亞方舟等等。

4. HeHe醬焗蠔

乜嘢係HeHe醬呀？其他即係他他醬，不過有別於平日食嘅他他醬，呢個HeHe醬係用咗菠蘿同沙律醬調成，味道香甜清新，加埋蠔肉夠大粒，食落鮮甜又有咬口。

5. 奇異豬膊士

店子以天然嘅奇異果汁，將豬頸肉浸過夜，奇異果有天然鬆肉嘅效用，可以令豬頸肉無咁韌，燒熟之後再沾醬汁食，口感清爽啲，無咁油膩。

6. 海膽茶碗蒸

充滿鮮味嘅蒸蛋，入面有海膽、蟹柳、蟹子、冬菇等配料，好有鮮味，蛋亦好滑溜。

7. 各款串燒

人人都愛嘅串燒，唔使講太多，無得輸，有蜜汁豚肉、蒜燒安格斯一口牛、明太子玉子燒、芥茉籽燒牛舌、韓風雞肉、焦糖菠蘿及鹽燒海蝦。

8. 原盅雞燉翅

製作燉湯嘅過程好繁複，先用雞、金華火腿熬煮3-4個小時煮出湯底，然後再以雞肉、急凍翅及白菜放入燉爐燉3-4個小時先完成，令配料嘅精華完全流入燉湯之中，令燉湯更有味道。

9. 純鮮榨橙汁

留意番，呢個並非普通嘅鮮榨橙汁，而係用新鮮香橙喺客人面前榨出鮮橙汁，1杯橙汁都要用成2-3個橙架，而且無加糖，好natural。而且呢部榨汁機用咗特別技術，令榨汁過程之中唔會壓搾橙皮，所以橙汁味道不會有橙皮嘅苦澀味架！

10. Movenpick雪糕

食到尾聲，當然要開始我哋嘅第二個胃──甜品環節。呢度有movenpick雪糕，每日都會有2-3款口味選擇。另外仲有幾款人氣雪條，仲有自家製嘅的骰甜品架！

其他食物：

天婦羅及炸物之中，開飯仔推介虎蝦天婦羅、酥炸香蕉以及土梨天婦羅。

（前）法式香檳煮蜆（後） 鮮蟹粥

飲品櫃多到好似便利店咁！

供應時間：6pm-8:30pm、8:45-11:30pm

價錢：
（星期一至四）成人$382/位、小童$168/位、長者$188/位
（星期五、六、公眾假期及其前夕）成人$441/位、小童$168/位、長者$188/位

一樂
地址：尖沙咀寶勒巷6-8A盈豐商業大廈2樓

文：Joy