到底鹹蛋黃熱潮仲可以去到幾盡？開飯仔唔直接答你，我搵例子嚟答你：連梳乎厘班戟都有鹹蛋黃口味！呢間梳乎厘班戟店最近推出四款新口味，由大熱鹹蛋黃到茶餐廳Feel嘅花生醬都有，即刻約埋你個甜品控朋友一齊掃街！
咸蛋黃梳乎厘班戟（雙件 $45）（單件$30）
Bove即日起推出四款新口味梳乎厘班戟，當中最有話題性嘅，就肯定係鹹蛋黃口味。到底近年大熱嘅口味遇上人氣甜品係咩玩法？店員會喺梳乎厘班戟當中加入鹹蛋黃，煎好後再喺上面加一層吉士醬同脆米。
食落味道又估唔到幾Match，中間嘅鹹蛋黃仲有少少流沙效果，同軟綿綿嘅班戟、帶淡淡奶香嘅吉士醬都夾得嚟。脆米就主要係增加口感層次，整體食落唔會太Heavy。
瀑布花生醬梳乎厘班戟（單件$30）（雙件 $45）
而呢款係開飯仔私心推介，因為花生醬真係落得夠爽手有瀑布效果，再加少少煉奶畫成花紋。而且班戟裡面都有粒粒花生醬夾心，鍾意食花生嘅朋友一定超愛！
仲可以按自己口味添加煉奶，加完之後味道有啲似茶餐廳嘅奶醬多，不過脆口嘅多士就換成空氣感嘅梳乎厘班戟，一樣好有新鮮感。
更多【飲食潮流】： |
Bling Bling藍莓梳乎厘班戟（單件$35）
鍾意相機食先嘅Foodie應該見到佢就會Bling Bling眼，因為特別調配嘅藍莓醬有Bling Bling效果吖嘛！連梳乎厘班戟都特別轉成藍莓口味，紫色控應該都會心心眼埋一份。
略嫌食落味道偏甜咗少少，同朋友Share食會好啲。
歌劇院梳乎厘班戟（單件$35）
呢款口味嘅梳乎厘班戟顧名思義係以歌劇院蛋糕為靈感，上面係特調醬汁加上黑白朱古力碎，班戟裡面再加朱古力夾心。值得一讃嘅係呢款富朱古力香但無太甜嘅問題，朱古力控絕對可以一個人食哂成件呀。
Bove x Modos
元朗又新街38號恆富大廈地下15號舖
九龍灣牛頭角道77號淘大商場地下G128號舖
文、相、片：Cathy