平時提及呢個法國糕點品牌，都會諗起近年新出嘅松露雪糕，或者係經典OPÉRA蛋糕。不過今次位於太古廣場嘅新店就以巴黎飲食文化做主題，朝早嚟買份三文治或者鬆餅得，中午嚟食個Lunch亦得，三點三嚟食個Tea Set得，放工嚟Happy Hour，甚至任何時候嚟飲杯咖啡食件蛋糕都得啫。
 

龍蝦修女泡芙

DALLOYAU太古廣場新店無論係鹹食定甜品都有多款選擇，最特別嘅就要數到呢個龍蝦修女泡芙，望落同平時食開嘅修女泡芙無乜分別，但切開就有驚喜！裡面係Creamy嘅龍蝦肉牛油果餡，所以口感同甜嘅修女泡芙都好似，但就多咗一絲絲龍蝦肉嘅質地。而且味道完全唔同，賣相同味道都幾有驚喜。
 

法式鴨肉層批

而法式鴨肉層批賣相就同品牌經典OPÉRA蛋糕有異曲同工之妙，以油封鴨配合薯蓉、香草同法國傳統芥末籽醬，再以酥皮做批底，口感同味道層次都非常豐富。
 

煙燻三文魚洋薊蘑菇

想食Light啲嘅話，呢碟煙燻三文魚洋薊蘑菇就啱哂。下面係洋薊、蘑菇同牛油果，上層就用蕃茄啫喱同煙燻三文魚包住水煮蛋，一切開蛋汁緩緩流出，令人食指大動！而且味道豐富，無論係蕃茄啫喱嘅清爽定三文魚嘅脂香都相當突出又平衡得宜。
 

酥皮鴨肝

講到經典法國菜嘅食材，自然唔少得鴨肝啦，橢圓形嘅千層酥皮包住香煎鴨肝，酥皮嘅輕盈酥脆對比返鴨肝嘅肥厚豐膄，係明知道「邪惡」但都會忍唔住一啖接一啖咁食哂嘅美味。另外亦有香烤鱈魚、茴香酒煮大蝦扁意粉、炙燒黑椒牛柳同法式油封鴨腿等選擇。
 

鮮奶泡沫特濃咖啡 (Café Noisette)

新店一角仲特設咖啡專櫃，最特別嘅就要數到新店獨有嘅巴黎特色咖啡啦。巴黎飲到嘅咖啡有咩特別？就係佢地嘅咖啡比一般美式咖啡濃郁。好似呢杯鮮奶泡沫特濃咖啡，就用一Shot Espresso配一小羹奶泡。唔好睇Noisette中文係榛子咁解就以為有榛子，其實意思係指榛子咁大嘅奶泡呀。
 

雙份特濃忌廉咖啡 (Café Viennois)

唔慣飲咁濃嘅話，就可以飲呢杯雙份特濃忌廉咖啡，雖然有Double Shot Espresso，但上面再加一圈圈嘅鮮忌廉，自然甜同Creamy得多，容易入口。而且餐廳選用世界各地嘅優質咖啡豆，其實就咁飲亦唔會話太苦嘅。
 

 

聖誕老人泡芙 - 紅桑子

聖誕朱古力香橙慕斯

歌劇院蛋糕 -  榛子

餅櫃亦有各款OPÉRA蛋糕、馬卡龍、朱古力、蛋糕等精緻甜品，畀大家配咖啡用。最新推介當然係聖誕限定嘅聖誕老人泡芙、聖誕朱古力香橙慕斯，同白雪雪嘅榛子歌劇院蛋糕啦。
 

除咗Coffee Corner之外，新店仲特設吧枱，畀大家Happy Hour飲返杯，或者等位嘅時候食住小食先。堂食座位亦相當雅緻舒適，有種尊貴版法式小酒館嘅感覺。甚至朝早亦可以嚟買返份每日新鮮焗製嘅麵包同糕點做早餐，任何時段嚟都可以品嘗到法式美食。
 

DALLOYAU
金鐘金鐘道88號太古廣場3樓325B號舖

文、相、片：Cathy