有時一個人想食吓一盅兩件，嘆返件高質嘅點心，又唔使吓吓都去酒樓。黃埔最近新開一間主打荷葉蒸飯、足料燉湯及自家製點心嘅專門店，餐廳喺石門已經創出口碑，最近於黃埔開設分店，除咗繼續賣靚湯、特色蒸飯及手工點心，仲推出幾款新店嘅新菜式，而且款款都係誠意之作，附近嘅街坊可以去試試！

金銀蒜香龍蝦飯($128)

其實餐廳一開始係以賣蒸飯起家，之後先開始賣埋點心及燉湯，呢個籠仔荷葉蒸飯系列係佢哋招牌，飯有特別技巧處理，經過三次蒸煮兩次風乾，飯粒粒分明，連埋龍蝦一齊生蒸，龍蝦嘅鮮味滲晒入飯度，一打開鮮味香濃，加埋自家製撈飯豉油食好開胃。

蒸廬拼美點(九件)

所有店內嘅點心都係即叫即製，由搓皮到餡料，都係每朝由師傅手工製作，粒粒新鮮。想一次試勻招牌點心，必試 九件點心拼盤，一盤有晒蝦餃、燒賣、粉果、菜苗餃及馬拉糕等，餐廳會睇返當日有咩點心新鮮而供應。

抹茶流汁叉燒包

去飲茶叉燒包都係必食，而呢度就推出創意抹茶流汁叉燒包，包皮由抹茶製成，帶有淡淡抹茶香  甜甜鹹鹹又幾夾，而叉燒餡就比坊間加少啲粉芡，所以有輕輕流汁效果。

紫金流沙包、黑金流沙包

鍾意食爆漿流沙包，呢度除咗基本口味，仲有新出嘅紫金流沙包，內餡係紫薯同紫芋，兩者味道都好香濃，仲食得出一粒粒嘅芋頭，真材實料。

雪花蛋散

坊間嘅蛋散多數都係加糖漿，而呢度係用鍊奶，味道反而無咁膩，加埋椰絲口感更豐富。

法式咖啡焦糖燉蛋

喺食中式點心嘅餐廳好難得會見到焦糖燉蛋，呢度嘅焦糖燉蛋上層香脆，內餡加入咖啡反而唔會死甜。

花膠蟲草花栗子燉土雞湯

燉湯都係餐廳用心之作，最少燉5小時，原盅入原盅出。而且唔會加水，客人一定飲到原汁原味，  燉湯亦唔會作任何調味，客人可以之後自行調較。花膠蟲草花栗子燉土雞湯係店內最人氣，選用靚嘅原隻花膠筒，充滿骨膠原。

蒸廬

地址: 紅磡船澳街99F號黃埔新邨佳富樓地舖

文、相、片: Yanica