講起食海鮮，通常唔係諗起西貢就係流浮山，以後，不如加埋黃埔入list啦，早前同大家介紹過嘅五萬呎水產概念場，又開多咗幾間餐廳喇，而且海鮮大街仲多咗好多種類嘅海鮮，嘆住冷氣咁揀完，就可以拎過隔籬餐廳交畀大廚處理，安安樂樂等食！
一睇個名就知呢間主打食蠔嘅，生蠔熟蠔都有，係「馬神」馬德鐘開㗎，會按季節時令入口唔同地方嘅生蠔，目前供應緊嘅係嚟自法國、愛爾蘭同韓國嘅生蠔。望住大廚即開即食，夠晒新鮮，大大隻嘅法國La Go’s Speciale蠔，海水味好重下。到9月底前都仲做緊$10一隻蠔嘅特定優惠呀，喺隔籬酒窩買支酒就有so嚕。
而焗蠔就有5種口味：菠菜芝士、香草牛油黑菌、忌廉薑汁、紅洋蔥蕃茄煙肉同埋墨西哥辣味焗蠔。
推介兩款濃湯配脆炸生蠔，黑菌湯以大量蘑菇同黑菌熬製，而法式干邑龍蝦湯就係原隻新鮮龍蝦熬出嚟嘅，配埋特製魚湯同龍蝦蓉，兩者味道同樣香濃。邊飲邊食隻炸生蠔，外脆內滑，鮮味更突出。
酒窩
同樣都係由馬神開嘅，收藏咗超過13個國家嘅佳釀，產地唔止法國、日本等，連黎巴嫩同土耳其都有，紅酒、白酒、香檳同威士忌都有，啱晒酒鬼。
水產巿場內嘅海鮮大街，有成60個魚缸，每個魚缸都可以獨立調節水溫，由鮑魚、蟹到蜆、魚通通都有，較少見嘅海白膳、法國藍龍蝦等都可以喺度搵到。揀完之後，返屋企自己煮又得，選擇拎去隔籬餐廳搵大廚幫手搞掂又得。海福樓係其中一間可以協助烹調海鮮嘅餐廳，亦係場內暫時惟一一間中菜館。
呢度海鮮煮法變化多端，例如皇帝蟹同海白鱔都有做二重奏，前者原隻蟹蒸熟後，蟹汁蟹腳連埋蛋白蒸，蛋白嘅口感較實淨，同坊間食開嘅滑蛋唔同。而其餘蟹肉則連同蝦粒呀帶子粒呀等一齊變成皇帝蟹蓋焗飯，有牛油、芝士、南瓜汁做汁底係幾香嘅。
至於海白鱔，就半炸半蒸。鱔條炸到脆身，搭椒鹽拌炒，佐酒幾啱。另一食法，就係先將白鰂魚熬成湯，再加入厚切海白膳，本身魚湯鮮味足，鱔肉又彈牙，係幾唔錯，但加埋大釘涼瓜後就未必人人都接受到喇……
而日本元貝，一般都用開蒜蓉同蔥蒸嘅，呢度就加咗啲新意思，用黑蒜同唐芹粒嚟蒸。Btw，有大廚切埋煮野食係幾爽皮嘅，但加工費就要海鮮價嘅50%喇……
呢間喺尖沙咀都有店嘅甜品舖，以綠茶甜品而聞名。嚟到水產巿場到開舖，除咗甜品外，亦有特別推出海鮮海藻烏冬麵，烏冬麵係用100%純日本小麥粉做，煙韌滑溜。
而班戟系列亦係呢間店嘅限定菜式，有幾款唔同口味。綠茶控無懸念實係揀綠茶味，伴碟嘅仲有綠茶糯米糍、焦糖杏仁片、綠茶雪糕同自家製小丸子。而士多啤梨嗰款賣相都幾靚，仲有細細份布甸仔喺頂。Pancake嘅蛋味做得唔錯，但質感略嫌過濕。
文、相：Kar