放題唔係日韓燒肉或打邊爐嘅專利，點心都可以做放題呢！最近唔少酒樓同酒店級中菜廳，都相繼推出點心放題，有啲只係需要百零蚊就埋到單，好易回本！啱晒各位大胃王，帶埋家中長輩一齊食餐飽！

名館 超過30款即叫即蒸新派點心

位於銅鑼灣嘅新派Fusion中菜館，今次推出嘅點心放題亦以新派為主，可以歎盡由名廚炮製嘅30多款粵式新派點心。招牌銀湖天鵝酥，金黃酥脆嘅表層包裹住微甜嘅紫薯蓉，外皮酥香，紫薯餡甜而不膩。咖喱蒙古羊肉餅都有驚喜，羊肉餡餅鮮香多汁，烤過後外焦裏嫩，咖喱香氣同羊肉配搭得啱啱好。另外仲有鮮肉一口小籠包、筍香蝦餃皇、酥皮菠蘿餐包、芝士鮮蝦春卷以及一系列主食同涼菜～

樂雅軒 午市任點任食點心套餐 

呢個午市任點任食點心套餐夠晒多元化，除咗供應超過40款點心、仲有小食、飯麵同甜品，款款點心都即叫即蒸。包括露筍蝦餃皇 、鵪鶉蛋燒賣、酥炸魷魚鬚、黑毛豬叉燒包、甜酸炸雲吞、鎮江肴肉同豬腳薑醋等。食飽飽又點少得甜品如養顏紅棗糕、紫薯包同薑汁叠千層等，選擇多到唔知點揀，最緊要你個胃有位。

訂座優惠：午市任點任食點心套餐 每位$298 預訂9折 (按此)

利寶閣 100分鐘黃金點心放題 

呢間高級粵菜酒樓以黃金點心做主題，包括爆漿金沙蝦球、金沙上素腐皮卷、金沙蝦餃等，鍾意金沙系列嘅朋友不可錯過！另外供應超過40款經典點心同特色小食，包括黑金流沙包、晶瑩鮮蝦餃同蝦籽燒賣皇，款款都好足料～每位成人更獲送原隻鮑魚酥及花膠灌湯餃一份，好抵食！

The Chinese Library 無限點心品味午宴 

想食好啲同慢慢食，可以試下呢間喺大館嘅中菜，佢哋嘅無限點心品味午宴可以一嚐多款特色點心，最長仲可以食四個半鐘。如花椒蘆筍蝦餃，花椒味恰到好處，唔會蓋過蝦肉鮮味；松茸冬菇包個包身好鬆軟，松茸味同菇味都好香濃～除此之外仲有黃金粉果、椒麻雲耳雞蛋乾、燒椒黃金皮蛋同乾蔥醬炒蝦米腸等多款坊間好少有得食嘅小食同點心，機會難得呀。優惠淨返幾日就完喇留意返。

訂座優惠：訂座Unlimited Dim Sum Weekend Lunch Menu 可享無限點心放題

Dim Sum Library 無限點心下午茶 

同樣主打新派嘅摩登點心店，不過佢哋就唔係晚市同午市，而係下午茶點心放題！食客可於2小時內享用豐富嘅傳統同創新點心，推介麻椒龍蝦餃，一入口先感受到濃濃麻椒香氣，跟住就到龍蝦嘅香甜，好味又有新鮮感。另外紅菜頭野菌餃、雞油菌冬菇包、鮑魚娘惹雜菌春卷同黑炭魚香咸水角都值得一試～

海雲天 創意中式點心放題 

超人氣創意中式點心放題，$168就可以任食超過60款點心小食，好多都好特別～包括鮮蝦莧菜餃、芫荽燒賣、麻辣蝦餃、芝士蛋撻等，甜品有中有西，如傳統菲林芝麻卷同西式嘅布朗尼等。而且有埋海景睇，啱晒各位大胃王去～優惠期去到今個月尾咋，快啲最後衝刺喇。

餐飲券：
周末假日點心放題 -早市/下午茶90分鐘任食 (入座時間11:00/14:30)
周末假日午市點心放題 – 午市90分鐘任食 (入座時間12:45)
創意中式點心放題 (星期一至五適用) 享受味覺盛宴！

圖: KathyPun

聚盈樓 90分鐘精選懷舊點心午市放題

潮流興新派，呢間中菜館反而堅持製作傳統點心，主打各種傳統冷熱門點心同甜點，令顧客食到80年代正宗傳統味道。包括坊間好難再見到嘅懷舊燒腩卷、鳳凰煎米雞等，前者用鬆軟嘅麵包夾住肥厚嘅燒腩，燒腩仔充滿肉汁，香口又鬆化；後者將糯米雞沾上蛋液煎香，外脆內軟，而且一啖就食到到脆同軟糯兩種口感～仲未完，鮑魚燒賣皇、香脆榴槤酥及鮑汁靚鳳爪都值得一試，不過留意返有大約5-6款點心只可叫一次呀。

文: Yanica