唔少人去大阪都會去食串揚，最近尖沙咀就開咗間關西風串揚專門店，八成材料由日本新鮮直送，即點即炸。口味配搭有新意之餘，加上自家製醬汁好有去咗大阪咁嘅感覺。呢個5月仲有新張優惠：$1串指定串揚！
 

鯡魚子昆布（$58/串）配自家製醬汁

Mo Mo Kushiage位於尖沙咀厚福街，由有超過10年日本料理經驗嘅總廚忠師傅主理，主打串揚，即係日式串炸，亦係日本關西地區嘅平民美食之一。新店嘅關西風串揚有肉類、海鮮、時令蔬菜等選擇，而自家製醬汁就用咗紅酒、果醋等調配而成，微酸解膩。由於疫情關係，醬汁會以每人一份形式上枱。
 

日本年糕、蝦餅三文魚子、男爵馬鈴薯、青森蒜頭、蘆筍、日本蠔、半熟玉子、芝士火腿（優惠期間可以$1追加/串*）

想試嘅話唔好錯過新張優惠：憑堂食任何消費，即享優惠價$1/串追加以上八款指定串揚！所有串揚都係即點即炸，全靠師傅功力控制唔同食材炸嘅溫度同時間，炸出金黃薄脆嘅炸衣，香口同時又食得出食材本身嘅鮮味。
 

蝦餅三文魚子（$48/串）

必點招牌串揚係呢份蝦餅三文魚子，手打蝦餅選用白蝦同甜蝦蓉，炸好後加上自家製他他醬同三文魚子。蝦餅本身相當鮮甜爽口，再加三文魚子鮮味十足。他他醬解膩同時增加味道層次。另一推介係鯡魚子昆布（$58/串），魚子用昆布醃製以去腥，炸過後外層酥脆，裡面有一粒粒魚子爆開嘅脆卜卜口感，鹹鮮味突出。
 

豚肉卷（紅薑、芝士、蔥、莓醬）（$42/串）

師傅喺食材同醬汁配搭都落咗唔少心機，好似豚肉卷就有四款唔同口味。紅薑味道酸爽，莓醬酸甜清爽，蔥嘅微辛同樣解膩，芝士炸至半融增加香氣。豚肉就同樣柔嫩，而且仲保留到肉汁。
 

炸磯煮鮑魚（$98 /串）、法國鵪鶉髀肉、法國血鴿髀肉（各$58/串）、炸豚踭（$42 /串）

海鮮串揚亦相當出色，鮑魚鮮嫩彈牙，炸成串揚增加香脆口感同時亦食得出磯煮鮑魚嘅濃郁鮮味。飽滿多汁嘅日本蠔（$48/串）同樣值得一試。肉類方面亦有坊間少見嘅選擇，好似法國血鴿同豚踭，前者肉質鮮嫩後者較為軟腍。
 

 
關東煮（$118/5款）

關東煮亦採用關東做法，以白醬油代替一般醬油，再加清酒、味醂等製作高湯，湯汁更清澈淡雅、溫潤鮮甜，襯托出食材風味。關東煮有男爵馬鈴薯、年糕福袋、魚板、豆腐、鵪鶉蛋、玉子、日本蘿蔔等煮物選擇。男爵馬鈴薯鬆軟綿密，年糕福袋口感煙韌。
 

茶漬飯（明太子）（$58）

日式居酒屋常見嘅茶漬飯呢度都有，清爽嘅高湯，加上辛辣鹹香並重嘅明太子同增加鮮味嘅紫菜絲，最後食返碗就最滿足。
 

自家釀製果酒（$68/杯）

食串揚又點少得酒？餐廳供應多款自家釀製果酒，開飯仔拍攝當日就有紅石榴、鳳梨、咖啡、梅酒等選擇，果味自然香濃，令25%酒精濃度嘅燒酎變得更易入口。
 

Mo Mo Kushiage 
地址：尖沙咀厚福街12-12A號藍馬商業大廈21樓
*$1串揚新張優惠只限2021年5月1日至5月31日，每人每次只限加購2串

文、相：Cathy