早前消費者委員會檢查市面上唔少曲奇、蛋卷等甜酥餅，發現唔少都含有害污染物或基因致癌物，唔通今年農曆新年就唔可以食蛋卷？又唔一定，呢個品牌就主打喺香港自設廠房，每日生產無添加蛋卷，加上口味獨特，好似中國芝士、貓山王榴槤、金莎鹹蛋黃等，拜年送禮定自私食都得，得咗！
 

「尊」系列蛋卷之前只喺網上同部分美食展、例如美食博覽有售，最近終於進駐尖沙咀壹號手信地舖。品牌由有超過20年烘焙經驗，前龍島餅廚黃炤豪師傅監製。選用紐西蘭Anchor牛油、日本麵粉，同韓國幼細砂糖。每日喺香港自設廠房人工手作，唔添加任何防腐劑及人造色素。
 

中國芝士蛋卷（$78/盒）

每日仲會有唔同口味嘅即製蛋卷畀大家試食。好似開飯仔採訪當日就係中國芝士蛋卷，即係腐乳口味呀！配方經過改良，選用帶微辣嘅腐乳，唔單止聞起嚟有腐乳獨特香味，食落少少辣椒碎亦可以帶起鹹味，惹味得嚟又夠哂特別！
 

金沙蛋卷（$128/盒）

而新春拜年要有好意頭，就要買金沙蛋卷啦！加入鹹蛋黃令蛋卷賣相更顯金黃，而且鹹蛋黃嘅鹹香同蛋卷嘅酥脆口感非常夾，小心一條接一條食唔停口呀。
 

牛油蛋卷（$68/盒）

另一款好受街坊歡迎嘅，就係最基本嘅牛油蛋卷。一如上面介紹，用紐西蘭Anchor牛油配頂級雞蛋，食落香脆之餘仲有淡淡雞蛋香同牛油香，而且唔會有油膩感，簡單而滿足。
 

 

抹茶蛋卷（$78/盒）

榴槤蛋卷（$88/盒）

最後仲有兩款特別口味畀抹茶控同榴槤控！抹茶口味選用日本宇治抹茶粉，食起嚟啖啖抹茶清香。而榴槤蛋卷更加採用馬來西亞貓山王榴槤果肉，有榴槤甜香得嚟最後有啲啲回甘，識食嘅話就知帶少少苦係貓山王呢個品種嘅特點！
 

嘗琉珍原味夏威夷豆塔（$120/盒）

而呢間手信店除咗蛋卷之外，亦引入台灣等地唔同嘅零食。好似呢個就係嚟自台中嘅夏威夷果仁撻，撻底酥脆，加上夏威夷果仁、小紅莓乾、焦糖醬，口感豐富有甜香。
 

壹號手信
地址：尖沙咀加拿分道8至12E號嘉芬大廈地下H舖

文：Cathy
相、片: Tom Li