召集新界同九龍嘅各位「甜魔」，呢間印尼冬甩品牌繼灣仔首間分店後，終於嚟到將軍澳開第二間香港分店喇！單係新店限定嘅Cronut就有12款口味，加埋各款招牌冬甩，同最近期間限定嘅全新口味冬甩，真係要搵多幾個同伴一齊試呀。
 

嚟自印尼嘅J.Co Donuts & Coffee 將軍澳新店同樣主打新鮮製作嘅冬甩同多款咖啡，不過比起灣仔店就多咗分店限定嘅J.Cronuts系列。Cronut即係糅合咗牛角包（Croissant）特色嘅冬甩（Donut），食落口感比平時食到嘅冬甩更鬆化酥脆！
 

12款J. Cronuts口味包括Oreology（Oreo碎配白朱古力）、Tira Miss U（Tiramisu）、Al Capone（比利時白朱古力配加州杏仁）等。Bite Size方便食得嚟又無咁大罪惡感。
 

而冬甩都有新口味，期間限定嘅奶茶非常有港式風格，冬甩裡面係紅茶忌廉，上面亦淋上一層混入紅茶粉嘅朱古力。
 

不過味道方面就稍嫌朱古力味比較霸道，奶茶香主要集中喺中間嘅忌廉。不過勝在甜度適中，而且依舊唔會太油膩。全線分店之後仲會有鴛鴦同Chocomatine口味冬甩連續推出。各位無甜不歡嘅「甜魔」就有藉口去多幾次啦。
 

食甜嘅冬甩最啱配返杯香濃嘅咖啡，餐廳用嘅係嚟自印尼嘅阿拉比卡咖啡豆，香氣醇厚酸度較低。
 

而夏天消暑最啱嘅冰沙亦有多款咖啡同朱古力口味，好似呢杯Oreo Frappe就食到粒粒Oreo餅碎。
 

將軍澳店同時亦供應早餐及方便Grab & Go嘅輕食，好似牛角包同Panini。見你睇到最後咁捧場，開飯仔講多個好消息畀你聽：品牌有望喺今年9月底至10月，於旺角開設第三間分店！想知道更多消息，就要密切留意我地OpenRice啦。
 

J.Co Donuts & Coffee
地址：將軍澳唐德街9號將軍澳中心地庫1樓B15號舖

文、相、片：Cathy