荔枝角嘅街坊同附近嘅上班族有福啦！呢區最近就新開咗間日式料理，主打日式丼飯、手卷同壽司，餐廳向相熟供應商拎貨，所以做到價錢平之餘，用料仲夠新鮮，而且食材保證絕不放隔夜。

最特色嘅係餐廳所有丼飯、手卷同壽司都用江戶前赤酢去秘製壽司飯，「赤酢」又稱「粕酢」，熟成酒粕經儲存一年再加以發酵，赤酢呈琥珀色，酸味較強帶少少酒香味。

海膽富士山($168)

海膽控見到呢個丼飯心心眼未？選用北海道海膽，份量足足有成一板咁多，完全唔使慳住食，味道鮮甜，略帶回甘。而海膽來源會跟返時令轉㗎～

上勝特盛丼($188)

有選擇困難症嘅餵食鬼叫呢個特盛丼就啱啦！一個飯有齊牡丹蝦、拖羅、拖羅蓉、海膽、三文魚、油甘魚、帶子、魚籽同玉子。拖羅油份高，入口即溶。

特上鮑羅鰻有($198)

呢個就飯如其名，有磯煮鮑魚、鰻魚、中拖羅同拖羅蓉，鮑魚彈牙鮮味，鰻魚厚身，中拖羅仲附有一小塊金箔添。

香蔥拖羅蓉丼($148)

至於拖羅控，呢個丼一樣唔可以錯過！拖羅蓉混合咗大拖羅同中拖羅，會有唔同嘅味道同口感，再加埋拖羅油成個飯就更香啦～

原條蒲燒肥厚鰻魚飯(大$138、中$98、小$88)

鰻魚飯都係其中一個抵食之選，$138就有原條蒲燒鰻魚嘆，即叫即燒，肥美厚身，連埋甜甜嘅醬汁同滑蛋，一啖食落口真係好滿足。

龍蝦醬燒龍蝦手卷($88)、海膽富士山手卷($88)

龍蝦手卷出面就少見啲，即叫即燒原條澳洲波士頓龍蝦，用牛油稍稍調味，再加入用龍蝦膏同蛋黃醬製成嘅醬汁，又鮮又惹味。

上勝日本料理

地址: 荔枝角長義街10號昌隆工業大廈地下2B舖

文、相、片: Yanica