（圖：米芝蓮）
《米芝蓮指南曼谷、布吉與攀牙2019》現已公佈！第二屆多咗唔少新餐廳，10間新摘星餐廳當中有7間都係主打泰國料理！而上一屆只有曼谷餐廳，今年布吉就有代表成功突圍而出，奪得米芝蓮星級肯定。總數有4間二星餐廳，及21間一星餐廳。
二星餐廳（廚藝高明，值得繞道就餐）：
雖然有啲可惜嘅係今年依然未有餐廳能夠得到最高嘅三星評級，但可喜嘅係Suhring成功由舊年一星耀升為二星。呢間現代德國菜餐廳Suhring一對德國雙胞胎兄弟Mathias同Thomas Sühring主理，糅合傳統料理技巧同現代歐洲風格。
| 餐廳 | 與2018年獲得的星級比較 |
|---|---|
| Gaggan | ─ |
| Le Normandie | ─ |
| Mezzaluna | ─ |
| Suhring | ↑ |
一星餐廳（同類中特別優秀的餐館）：
一星名單中有10間餐廳新上榜，大部分以泰國料理為主，包括現代風格同家常菜風味，足以證明米芝蓮評審員對泰國菜潛力嘅肯定。好似主打創意泰國菜嘅Le Du就由米芝蓮餐盤推薦晉升為一星餐廳，主廚Ton以佢喺紐約米芝蓮三星餐廳Eleven Madison Park嘅經驗重新演繹泰國菜。Sorn就主打南部泰國菜，兩位主廚花咗唔少心思去研究當地美食甚至係失傳嘅菜譜。
Sorn（圖：餐廳Facebook）
以當代泰國菜為主嘅Saawaan，餐廳翻譯返做中文係天堂咁解。只供應10道菜套餐，選用當地時令食材，例如信武里府嘅有機蟹同喀拉比嘅魷魚。而Pru係榜上唯一一間布吉餐廳，位於度假村之中，唔少食材嚟自自家96公頃大嘅農場，連牛油都係餐廳自製。
