疫情雖然令到我哋冇咗好多旅行機會，但就反而畀我哋發掘到香港原來都有好多好靚嘅地方，自製快閃小旅行。例如暫時未去到摩洛哥嘅藍色小鎮、越南粉紅耶穌聖心堂、澳洲彩虹小屋等，但就可以搵啲一樣都係以pantone色系做主色調嘅小店，打卡兼食飯呢~ bookmark以下呢10間，搵機會出走下啦~
紫色pet friendly小屋 安•珈琲 大埔
圖：入林村除咗搵許願樹，最新打卡熱點仲有呢間sharp紫嘅咖啡店。兩層高嘅咖啡小店，上層仲有露天座位，感覺chill chill der，主力提供蛋糕同飲品，巴斯克蛋糕芝士味香，仲有啲水果喺面添。另外，佢哋仲係間pet friendly嘅café，可以帶埋毛孩一齊去呀。
黃牆歐陸風 COFFEE LAB BY COUNT.DOWN 元朗
圖：位於錦田匯動青年館入面嘅呢間cafe，結合咗咖啡店同圖書館嘅概念，外面係歐陸風嘅黃色平房，入到去就有一大座落地書櫃，嘆返杯咖啡、食件cake仔再揀本書睇下，要做半日文青話都冇咁易。留意返呢度嘅食物係自由定價啊。
樸實粉藍小花牆 舒房 北角
圖：位於斜路上嘅呢間café，店如其名，粉藍色主調嘅牆身，畀人一種舒服悠閒嘅感覺。餐廳設有室內同室外座位，仲有幢小花牆最啱打卡。推介牛油果多士，微酸不膩，可以加配炒滑蛋或者煙三文魚等都得。
藍色貓貓打卡牆 stain+ 上環
圖：FionaChan411、餐廳Facebook
上環一向都係咖啡小店嘅勝地，新開嘅呢間咖啡店，藍色嘅外牆本來已經好啱打卡，仲要同本地藝術家合作，畫咗隻大大隻嘅可愛貓咪喺度，勢必成為最熱打卡位之一。呢度主要提供自家烘焙咖啡豆，同手沖咖啡，啡迷可以自由選擇自己喜歡嘅豆，請店員沖製，另外仲有貓咪咖啡掛耳包發售。
藍色小拱門 Grotto 鰂魚涌
圖：Blackcanary、jacquelinewong0205
深藍色牆身再加圓拱門嘅配搭，最啱就係影感覺照，點影都靚。餐廳提供多款西式美食，特別推介croffle，即係牛角包加窩夫嘅混合版，外脆內軟，牛油味香，夾埋香脆嘅焦糖香蕉一齊食好match。
日系純白屋仔 屋子空間 大圍
圖：大圍呢間四層高嘅純白色屋仔，早已打響名堂，唔少朋友仔都專誠慕名去打卡。日系簡約裝修風格，令到無論係室內室外定係露台，每個角落都輕易成為打卡位，坐邊影都咁靚。menu選擇包括有溫烏龍麵、丼飯、甜品同特色茶飲等。
型格黑色英倫風 Muse Furniture Lab 元朗
圖：打卡相唔一定下下都要粉色少女系嘅，有時全黑一張反而更型格。而且呢間café佔地面積大，風格多變。門口就係型格黑，入到去就變咗做貴麗英倫風，有好多好grand嘅傢俱擺設，再行出去仲有個綠色庭園，連鞦韆都有。鍾意影相嘅朋友仔可能係咁易就影咗成個鐘喇。推介可試可麗餅，配料有雞胸肉、三文魚同黑松露帶子等選擇，自由選擇醬汁，口感唔錯。餐廳暫時只係接受預約咋留意返。
深綠轉角小店 crew 灣仔
圖：呢間café可以話係灣仔鬧巿中嘅綠洲，夠晒plain嘅綠白色牆身，無論係幫model定係杯咖啡打卡，都絕對係IG文青風。佢哋嘅招牌咖啡，正確啲講係茶啡，espresso加埋cold brew伯爵茶，有種清新嘅感覺，絕對值得一試。
粉紅+彩虹系 野草 北角
圖：介紹咗咁多間pantone色系嘅小店，點少得粉紅色系呀？呢間餐廳完全可以滿足到每個鍾意打卡嘅朋友仔，全間舖都係打卡位嚟架，夠出幾個posts。充滿少女氣息嘅粉紅色門面同牆身不在話下，仲有成幢花花牆同埋彩虹隧道，靚到一個點。食物則以輕食為主，特別提一提芫荽黨友，呢度有用本地出產嘅芫荽，製成「成棵芫荽牛奶雪糕」啊。
復古鏤花鐵閘 順流精品咖啡 深水埗
圖：兩層嘅咖啡店，門口雖然唔算得上係pantone色，但係懷舊復古風嘅鏤花鐵閘，一樣係文青打卡最愛嘅pattern呀。店內則係工業風，灰白色主調加埋格仔地下，唔使落filter都夠晒vintage。無論係抹茶latte定椰子latte，都有陣陣甘香同靚靚拉花。
文：Kar
