手臂咁長嘅玉子燒你又見過未呢？深水埗最近就開咗間家庭式經營嘅日式小食店，招牌就係佢地嘅玉子燒Mega，足足有成20 cm咁長，另外仲有低溫慢炸吉列豬扒等都值得一試。所有食物都即叫即整，可謂誠意之作，想食就可能要等下啦～

玉子燒MEGA($68)、明太子玉子燒($25)

玉子燒蛋漿用咗兩種雞蛋，其中一款就係日本廣島蛋，味道會較creamy同埋顏色會偏向黃橙色，另外加咗昆布鰹魚高湯同三溫糖。煮玉子燒為咗令佢滑溜同保證內層熟，所以要用慢火遂層遂層煎再卷起，成個過程要用約10分鐘。明太子玉子燒味道鹹鹹香香，好惹味！

低溫慢炸吉列豬扒三文治($38)

呢款吉列豬扒三文治食落唔油膩之餘仲有肉汁，因為店主用咗低溫慢炸呢個方法。豬扒用咗美國豚肉眼，蘸上蛋漿同麵包糠後，放喺80度嘅油中慢炸8分鐘，再放喺180度嘅油炸一分鐘，所以食落個皮就脆卜卜啦！再加埋椰菜絲、吉列汁同芥末醬，惹味得嚟就無咁膩。

/p>

唐揚魷魚鬚($30)、熱狗棒($20)

小食店其他小食都幾有特色，好似呢款美式熱狗棒咁就唔係周圍都食到，熱狗棒外層有啲似銀絲卷嘅感覺，甜甜地脆卜卜。唐揚魷魚鬚無論熱食凍食都咁好味！

特色冷泡茶($18)

有桂花烏龍茶，玫瑰綠茶同玄米茶三個味，用冷水浸20小時，冷泡茶雖然茶味無咁濃，但拎到茶嘅幽香，同埋就無咖啡因，咁就相對健康啲啦～

幸福駅

地址: 深水埗元州街82號地下B號舖

文、相、片：Yanica