各位鍾意食生蠔嘅朋友，機會嚟啦飛雲！尖沙咀呢間西餐廳再次推出生蠔放題，今年仲新增唔同蠔肉料理，都係兩個鐘頭任食呀。而且仲可以加錢食埋主菜，或者Free-flow黑啤或者汽酒，當Happy Hour一樣得！
 

位於尖沙咀The One 20樓嘅峰景餐廳再次推出生蠔放題，分18:00-20:00同20:30-22:30兩個時段，$298/位另收加一服務費。不過唔洗先有任何消費，而且問返餐廳，舊年平均每位客人都食到2-3打，除返開都真係幾抵食！
 

任食即開生蠔+蠔肉料理

新鮮即開生蠔

放題主角當然係即開生蠔！餐廳選用法國西部阿爾卡雄(Arcachon)同布列塔尼(Brittany)嘅新鮮生蠔，蠔肉鮮甜而且富海水味。建議可以加少少乾蔥紅酒醋或者檸檬一齊食，無咁快覺得膩吖嘛。
 

青芥末、清酒醬油生蠔杯，青瓜檸檬生蠔杯

今年新增五種蠔肉料理，畀大家多啲選擇！生蠔Shooter有兩款口味，啡色嘅係用清酒、日本醬油加埋Wasabi輕醃，微嗆惹味；綠色係加入溫室青瓜蓉同檸檬汁，微酸清新，兩款相當Refreshing。
 

炸生蠔配柚子蛋黃醬

炸生蠔金黃香脆，咬落蠔肉咦相當嫩滑Creamy，點少少柚子蛋黃醬當送酒小食一流！
 

芝士煙肉焗蠔

菠菜焗蠔

兩款西式焗蠔相當足料，芝士煙肉有香濃芝士同煙肉香，忌廉菠菜相對就比較Light，而且都保留到蠔肉嘅肉汁。
 

中式蒸蠔

台式生蠔煎

仲有兩款中式口味，中式蒸蠔加中式豉油、蔥花同乾蔥再蒸熟，簡單而惹味。台式生蠔煎就似蚵仔煎，點埋甜辣醬更香口。
 

 
主菜推介

美國和牛西冷（8安士）（+$178）

單食蠔肉有啲悶嘅話就可以加唔同主菜，呢碟和牛西冷係選用美國養殖嘅日本和牛品種，兼顧肉味同油花，帶少少炭香味，食肉獸必點！
 

香煎海鱸魚（+$158）

想繼續食海鮮嘅話，有皮脆肉嫩嘅香煎海鱸魚，同清甜嫩滑嘅新鮮藍青口配白酒香草汁(+$168)任君選擇。
 

油封鴨菠菜雜菌意粉（+$148）

呢碟意粉就相當有心思，先將原隻鴨腿法式油封再撕肉絲，同菠菜雜菌意粉一齊享用，既有鴨肉油香又唔會搶去雜菌香味，味道層次豐富。
 

（左）Cava Rose有汽葡萄酒，（右）Erdinger Dunkel

想飲返兩杯嘅話，可以選擇加$128無限任飲Cava Rose有汽葡萄酒，或者加$88無限任飲Erdinger Dunkel小麥黑啤。
 

最後提提大家，生蠔放題供應人數有限，記得先訂位呀。暫時18:00-20:00首輪比較多空位，時間許可嘅話不妨約埋朋友嚟個任食生蠔Dinner！
 

峰景餐廳
*生蠔及蠔肉料理放題即日起至2018年7月31日，18:00-20:00及20:30-22:30兩個時段供應，不適用於2018年7月1日及其他包場活動日子，$298/位(另加一服務費)，請先訂位
地址：尖沙咀彌敦道100號The ONE 20樓

文、相、片：Cathy