尖沙咀呢個以藝術為主題嘅商場，淨係講過江龍餐廳都已經多到數唔晒，不過今次就唔係過江龍，而係一間抵食又靚裝修嘅意大利菜啊！餐廳主要供應各款海鮮及肉類，午飯時間仲有semi-buffet食，同三五知己嚟傾偈食嘢就啱晒。

餐廳裝潢寬敞，而且仲有落地大玻璃，景觀開揚。

講到呢個semi-buffet又真係幾抵食，星期一至五只係$298就食到，連埋主菜都係加$30，同區嚟講性價比都幾高～而且唔好以為淨係得湯呀、沙律嗰啲揀，選擇都好多元化，首先有個超大型沙律吧，淨係沙律菜同醬汁嘅選擇都有十幾款，啱晒各位崇尚健康嘅女士。 

想回本當然要食海鮮，海鮮冷盤都有好多選擇，如青口、大蝦、帶子及螺，樣樣都新鮮、爽口、彈牙。

另外仲有供應法式燒春雞及即切燒西冷牛肉，喺半自助餐嚟講真係少見啲。

甜品控一定唔可以錯過呢個corner位啊，有多款靚蛋糕，口味如椰子香芋、海鹽焦糖合桃芝士、Oreo朱古力、士多啤梨及藍莓芝士等，係咪見到都已經心心眼呢！特別推薦海鹽焦糖合桃芝士及椰子香芋口味，前者唔會過甜，焦糖香外帶有合桃甘苦味；後者就有濃濃嘅香芋味啊～

意式辣肉腸薄餅($168)

半自助餐暫時只有午市供應，不過其實主菜都一樣咁精彩㗎。意式辣肉腸薄餅材料只有辣肉腸、mozzarella芝士及橄欖，材料雖簡單但香辣惹味。

香煎頂級日本和牛扒配忌廉蘑菇汁($368)

和牛扒熟成程度啱啱好，肉質軟腍重牛味。

地中海香草蕃茄龍蝦意粉($348)

龍蝦嘅菜式都係餐廳嘅拿手好戲。好似呢個地中海香草蕃茄龍蝦意粉，龍蝦大大隻，鮮甜彈牙，配上微酸嘅蕃茄醬汁夠晒清新。

黑松露野生蘑菇卡布奇諾濃湯($68)

鍾意黑松露嘅朋友唔可以錯過呢個湯，選用野生蘑菇，黑松露同蘑菇味同樣香濃。

半自助餐價錢詳情：

星期一至五半自助午餐$298 (連主食) $328

星期六日半自助午餐$328 (連主食) $368

Velo Italian Bar & Grill

地址: 尖沙咀梳士巴利道18號Victoria Dockside K11 Musea 1樓103號舖

文: Yanica

相、片: Tom Li