藍色典雅又有格調，係唔少人都好鍾意嘅顏色！今期搵咗4間以藍色作主調嘅餐廳畀大家，有西貢三層小藍屋、星夜Cafe、森林主題餐廳同人氣西式cafe，大家食好嘢之餘仲可以打下卡。

目錄

三層小藍屋海景餐廳 Padstow Restaurant & Bar

好適合放假去嘆下嘅餐廳！位於西貢嘅三層小藍屋，藍色外牆同拱形建築都好吸睛，每一層都有唔同嘅體驗㗎。好似地下係酒吧餐廳，一樓用餐區裝潢簡約有型，頂層就係天台雅座可以吹海風。食物方面推介脆皮五花肉卷，採用英國最佳農場之一飼養嘅豬隻，肉味香濃外皮又香脆！仲有兩款以WEST啤酒炮製嘅菜式，包括聖蒙哥炸魚薯條同小麥啤酒煮藍青口，前者炸漿加入WEST啤酒調成，好鬆脆；後者就鮮味滿滿。甜品特別推介伯爵茶水煮梨伴自家製意式雲呢嗱雪糕同莓醬呀～

星夜主題藝術打卡餐廳 MONMONO

圖: maze123

尖沙咀超啱打卡嘅藝術餐廳，以星夜藍為主題，去食飯真係好似去咗另一個空間咁，店內仲有一架好型嘅車同大大個Casino招牌同埋懷舊電話亭畀大家影相！餐廳以日法fusion菜式為主，好似晚市2人餐嘅阿根廷紅蝦他他配濃汁手工幼麵，手工意粉零舍彈牙，每一條幼麵都掛咗濃濃嘅醬汁，紅蝦都好鮮甜！香草紅酒煮羊膝配辛辣彩椒中東小米都唔錯，羊膝煮到好軟腍～

森林文青主題 SENSU

圖: hungry_catss

以精靈之森為主題嘅木系日式西餐，有一排排垂吊嘅藍調花、樹木及燈飾，好似走咗入童話世界之中！唔少人都推介香辣甲拋大蝦肉碎蛋包飯，肉碎香辣惹味，蛋又勁滑溜，送飯一流。另外仲有蟹肉牛油果三色魚籽水波蛋吐司，真係超靚啱晒打卡，加入魚籽增添鹹香同口感幾特別。飲品方面，青森蘋果濃縮咖啡值得一試，選用日本青森蘋果，飲起上嚟好fresh！

超強Tiramisu The Hunt Coffee & Roastery

圖: rosy.foodie

又一間以藍色為主題嘅cafe，唔單止環境靚連食物都好出色～招牌US Prime Rib Eye熟成程度啱啱好，厚身又大塊，肉質新鮮，調味亦恰到好處，薯條香脆。仲有海膽鵝肝意粉，海膽新鮮鮮甜，鵝肝煎得外脆內軟，食落口好香入口即溶，扁意粉彈牙有質感，加埋野莓汁同香橙好清新有驚喜。最後當然唔少得招牌甜品Hunt Signature Tiramisu，mascarpone cheese、濃酒、純可可粉、手指餅巧妙咁配搭埋一齊，面層加上白朱古力脆片同香橙片，味覺同視覺都雙重享受呀。

文: Yanica