餃子經濟實惠又飽肚，而且湯餃同煎餃各有風味，而家仲發展到有唔少創意口味𠻹，一齊睇吓邊款有興趣？
流沙鹹蛋黃炸蝦餃 維港灣餃子坊
圖：meiyan__
元朗區內人氣餃子店～推介流沙鹹蛋黃炸蝦餃，整粒菜苗蝦餃炸到脆卜卜，淋上鹹蛋流沙醬呈現雙重金黃色，見到都超吸引！鹹蛋醬質地黏稠起沙，鹹蛋味恰到好處，餡內嘅蝦肉都好彈牙鮮甜，鹹蛋同鮮蝦嘅配搭令人驚喜。另外亦有供應芝士粟米雞肉餃子同黑松露鮮肉煎餃，前者咬落「噗滋噗滋」好爽甜；後者黑松露香氣突出。
椰香荔芋臘腸香菇餃 餃撚店
圖：cowing
呢間餃子店係人氣小菜館楚撚記大排檔嘅副線品牌，主要供應創意煎餃、點心同小食，多款餃子都好有創意呀。如獨門原創嘅椰香荔芋臘腸香菇餃，將椰香荔芋臘味煲嘅做法融入餃子餡，混合椰漿、芋頭製成蓉，再加入臘腸、冬菇等配料，芋頭蓉夠粉夠綿，臘味又好香。XO醬翠玉瓜帶子蝦仁餃就鮮味滿滿，加入XO醬再惹味啲。
麻辣芫茜豬肉餃 做乜餃
圖：iamNICO
荃灣手作餃子外賣店，走實而不華路線，即叫即煮，可以見到員工即場包餃子。內餡係以兩份菜一份肉嘅比例做基準，難怪唔少街坊都話有媽媽的味道啦。麻辣芫荽豬肉餃一入口滿滿肉汁，好飽滿足料，麻辣味會慢慢滲出，加埋芫荽層次更豐富又無咁易膩。
芝士比薩炸餃 有得餃
圖：選擇超多嘅餃子專門店，傳統款都成十幾款，另有創意款如芝士比薩炸餃，外皮炸至脆卜卜，內餡有芝士、洋蔥、豬肉碎等，當中茄膏味道非常明顯，酸酸甜甜，完全複製咗比薩嘅味道。泰式炸餃充滿香茅味道，好有泰式風味，另外金菇肥牛炸餃同頂級蟹粉豬肉餃都好特別。
大阪餃子燒 三一餃子 
圖：喺中環同旺角都有分店嘅餃子專門店，啱晒附近嘅上班族！大阪餃子燒係店內人氣產品，可以揀薑蔥或粟米味，感覺好特別，餃子上面鋪滿木魚、紫菜、蛋黃醬同大阪燒醬，有啲似食緊章魚小丸子。蒜芯豬肉餃都值得一試，蒜芯好甜又有咬口。
文：Yanica
編：Cathy
