5大烏冬店推介火炙壽喜燒牛肉沾烏冬、蝦濃湯吉利蝦烏龍麵

香滑煙韌嘅烏冬又有邊個唔鐘意食，今次搜羅咗 5 間好味嘅烏冬店畀大家！

日式沾烏冬肉肉烏冬

主打「武藏野烏冬」，發源地為東京嘅多摩地區同埼玉縣西部，日本師傅會使用埼玉縣麵粉手打成烏冬，顏色呈棕灰色，製作時會加入較少水份及較高鹽量吊出麥香，亦令麵條更有咬口。烏冬除咗熱湯更可以揀沾汁食法，例如火炙壽喜燒牛肉沾烏冬，沾汁用鰹魚湯、香菇、油揚及芝麻等製成，濃郁甘甜。薯仔忌廉咖喱烏冬就夠晒可愛，香濃嘅咖喱配上濃稠嘅忌廉，烏冬掛晒汁好正。

一人獨食烏冬店 SOLO UDON

圖: JCFOODGASM

一個人原來都可以盡興～呢間烏冬店裝修好似自修室咁一格格，採取自助形式落單，啱晒內向嘅朋友仔。主打選用 100% 北海道麵粉製作嘅手工烏冬，每日新鮮即做、口感煙韌。最推介係雞白湯叉燒烏龍麵，佢嘅雞白湯似家庭味道，鮮甜得嚟唔太黏口。蝦濃湯吉利蝦烏龍麵都值得一試，湯底超濃蝦味，加埋蝦油更加香，天婦羅蝦肉脆卜卜又彈牙。

百年歷史砂鍋烏冬店山本屋

圖: Lolinglingg

喺日本已經擁有近百年歷史嘅人氣砂鍋烏冬店，係品牌首間海外分店呀！由第五代傳人之一嘅青木晃佑坐鎮。烏冬以精選日本產小麥粉同過濾水，配合傳統手打技法製造，每條生烏冬生跟足尺寸為四毫米粗，再放入餐廳獨創嘅伊賀燒砂鍋燉煮，好彈牙。味噌烏冬係招牌，味噌用咗三年製作，味道濃郁，感受到味噌嘅醇厚。配料方面好似吉列豬扒及天婦羅等都好出色～

石燒手打烏冬石鍋堂

圖: memoching

呢間石鍋手打烏冬專門店，客人食到最後一啖都仲係熱辣辣，石鍋嘅熱力仲會令湯底嘅味道入哂烏冬到～湯底選擇有五款，黑松露香菇湯呈深啡色，用咗牛肝菌、天使菌、上等菇乾等八種菇類同日本空運乾菌熬成。食落菇菌味香濃，味道鮮甜。愛辣嘅朋友就要試地獄辛辣湯，湯底用咗大廚自己調製嘅泡菜去熬，辣度適中，同時保留住泡菜嘅辛香味同酸味，好開胃～