講到香噴噴嘅西式麵包，就會諗起香脆又鬆軟又充滿牛油香嘅口感同味道。香港地有唔少西式麵包店，有好多都由名廚開設或者係過江龍，成日都大排長龍添～但其實都有唔少嘅西式bakery小店好值得大家去發掘㗎！今次搜羅咗5間西式麵包小店畀大家，麵包控準備好bookmark未～

目錄

大坑人氣曲奇姊妹店 Vission Bakery

圖: nat.dailyyy

鍾意食甜品嘅朋友相信都有聽過Cookies Vission呢間人氣曲奇店嘅名，原來店舖最近喺中環開咗麵包店，質素一樣咁有保證！主打酥皮Pastry，款式多到令人眼花撩亂，最好賣係呢個Tiramisu Danish，外層香脆又充滿牛油香，入面真係成件Tiramusi放咗入去咁，creamy濕潤，咖啡味香濃帶有淡淡酒香。Caramel Cheesecake puff都好推介，酥皮好香脆，層次分明，中間好似蛋撻咁軟滑，芝士同焦糖嘅味道啱啱好。 

必食香脆牛角卷 Deesses Bakery

圖: popcorn55

一間少女風好濃厚嘅麵包店，無論係bagel定酥皮都有供應！嚟得一定要食招牌牛角酥，原味牛角酥先最能夠食到麵包師傅嘅功架，無論係麵包口感定牛油香呢啲基本嘢都做得好好。另外同樣係牛角系列嘅牛角卷都係必食，將一個牛角酥製成卷狀，更邪惡呀！海鹽焦糖味甜中帶鹹好滋味，想食清新啲嘅推介檸檬柚子牛角卷，酸酸甜甜令人不知不覺間就食晒成個。

外國人至愛法式餅店 PLUMCOT

圖: lastbitematters

大坑多寶藏食店就大家都知，呢間係由一對中法夫妻開設嘅手工麵包店，佢哋曾經喺巴黎嘅米芝蓮星級機構接受培訓，唔少居港嘅外國人都會特登嚟買包呢～堂食限定嘅Yuzu Pain Perdu，即係柚子French Toast，外皮煎得微脆香口，內裏保留咗麵包嘅軟熟口感，充滿蛋香，麵包體加咗柚子肉令人驚喜。咁當然牛角包都係招牌，質感好鬆脆，中間夾左Apricot醬食落酸酸甜甜幾特別。

多口味牛角包窩夫 Kroffle

圖: 貓豬豬

唔知由幾時開始，突然興起咗將牛角包製成窩夫，元朗呢間小店就以牛角包窩夫做主打！牛角窩夫麵團全部都係自家製，佢哋有5款醬料配搭選擇，例如煉奶、花生醬、朱古力、榛子同焦糖。最近仲推出埋爆漿窩夫系列，推介特濃開心果奶油同手工芋泥麻糬，前者開心果好濃厚；後者煙煙韌韌。另外仲有供應鹹嘅牛角窩夫堡，蒲燒鰻魚牛角窩夫堡，夾住鰻魚同滑蛋同埋生菜墊底，好似食緊burger咁，甜甜鹹鹹好過癮。

天后長龍麵包店 AOZORA Bakery

圖: 2tummies_foodie

因千層吐司而紅爆嘅麵包店，不過而家已經停售，其實佢嘅其他麵包都好值得大家欣賞㗎。如檸檬牛角包，冷卻後鬆脆依然，口感好似食緊巨型蝴蝶酥咁，就算食到最後都唔會成手油，而佢嘅lemon cream都唔係平時我哋認知嗰隻軟滑嘅質地，反而好似蛋白脆脆咁，層次更豐富呀。草莓酥一樣好有牛油香，不過就冇牛角酥咁酥脆，但多咗份草莓嘅清新鮮味，加埋少少煉奶提一提味，都好好食～

文: Yanica