英式炸魚薯條係當地嘅國民美食，大大件魚柳用啤酒醬裹起，炸至金黃色仍然保持有肉汁，配埋香脆嘅炸薯條更加滋味，係唔少炸物控必點嘅美食。今次介紹6間香港主打英式炸魚薯嘅餐廳畀大家，有英國專門店姐妹品牌、親民價外賣店、自選唔同魚類等選擇。
英國人氣專門店姐妹品牌 The Chippy
一講炸魚薯條，不得不提呢間近期登港、英國人氣Fish & Chips專門店Zan Fish嘅姐妹品牌。皆因食材100%由英國進口，並以傳統烹調手法呈獻正宗英式風味。炸鱈魚薯條分為3個分量，最大份嘅重達12oz，而鱈魚炸起更超過20cm長。如果堂食，可以免費添加亨氏蕃茄醬同亨氏他他醬，而青豆醬、咖喱醬同牛肉醬3款秘製醬汁則需要另外加配。
圖：親民價外賣店 Fryers
藍色店門、帶點小島風情嘅炸魚薯條外賣專門店，價錢親民，$53起就有交易。想方便啲開心share，可以揀一口魚；想大啖肉則可以揀原件炸魚，有中同大兩個size，前者有1件魚，後者則有2件，女仔揀中size基本都夠食。炸魚嘅脆醬薄身，而招牌他他醬嘅洋蔥味突出，食落更香口。另有意粉、西式湯品供應。
圖：多款魚類選擇 Fish & Chick 
Fish & Chick嘅傳統英式炸魚薯條，用新鮮魚柳製作，而且提供唔同地區嘅魚類畀大家揀，例如本地盲曹、紐西蘭藍鱈魚、北極紅點鮭等，亦有素魚選擇。魚柳沾上傳統英式啤酒醬，炸起外脆內嫩。部分魚款重可以揀香煎口味，畀鍾意食魚嘅朋友，一餐試到唔同煮法嘅魚肉。
圖：17feelgood、Drinkie_Foodie_Lok
多種口味+醬汁 白鬍子炸魚薯條
如果想試唔同口味嘅炸魚，呢間餐廳就啱你喇。招牌炸魚有泰式冬蔭功、檸檬黑椒、蒜香等口味，配粗身薯條；醬汁則可以6款中自選1款，包括自家製他他醬、蜜蜂芥末等。另外亦供應炸物拼盤、漢堡包等食品，一定夠飽。加上裝潢帶點韓式小店同酒吧風格，感覺好relax。
圖：西貢人氣小食店 Chip In Fish & Chips
呢間獲得「香港品牌」認證嘅本地餐廳，現時有3間分店，其中西貢總店係區內人氣小食店之一。主打嘅英式炸魚薯條選用MSC認證太平洋鱈魚配比利時粗薯條，鱈魚沾上傳統啤酒炸漿，以芥花籽油低溫炸成，令肉質保持嫩滑；另外亦供應素魚柳，更表明每塊有11.1g蛋白質𠻹。想試埋其他款式嘅話，魚柳包、炸Oreo都係唔錯嘅選擇。
圖：可以單件加配 Camden Town
西貢海傍街重有一個選擇，Camden Town主打英國菜，喺度可以吹住海風開餐。大size嘅炸魚薯條有3件魚，分量十足，另外亦可以單件加配，咁就無論幾多人share都嗌到一人一件啦。魚肉本身經過調味，建議先試原味再蘸醬汁。餐廳另有多款西式同期間限定菜式，如燒魷魚、澳洲和牛牛扒等。
圖：文: Cathy.C
