雞翼，你同我同佢都息息相關。小學大食會、中學聯歡會、公司搞Party，有時阿媽諗唔到煮咩餸…總之就係無處不在。但如果你嫌過去嘅雞翼太平凡而正想離棄佢嘅時候，唔好放棄住！咁就要睇吓下面嘅特色雞翼介紹，去尋找對佢嘅新鮮感！
少女心玫瑰雞翼 雞翼山
「不要儀態⋯只想吃雞翼。」深明呢個道理嘅呢間黃埔小店就提供埋手套畀你不顧儀態地用手食。呢到最特別嘅一定係佢哋嘅款式口味夠刁鑽。好似走少女路線嘅玫瑰雞翼、茶餐廳特飲嘅咸檸七味之類，估唔到雞翼都可以有咁多Style。
美式「混醬」 Wing It!
呢到嘅雞翼主要sell醬汁嘅mix and match。炸雞翼有original同crispy兩款，預先醃好就夠晒入味。當然唔係就咁炸完就食啦，呢到有成十幾款醬汁同調味粉，好多都係自家調製，而且每星期都有新醬汁，最啱貪新鮮嘅人。
即叫即做獨家配搭 咕嚕咕嚕
圖: girl_eatdas
太子呢間小食店嘅單骨雞翼都好出名，雞翼先剪成單骨同醃至入味，然後慢煮兩個鐘，收到Order再加醬汁同配料煎香。黑糖麥芽麥汁雞翼香甜得嚟有少少脆皮效果，叻沙麻辣雞翼夠惹味而唔會太辣。
邪惡口味 髀魔-雞髀第一店
之前西貢先有，依家太子都有分店。呢間雞髀第一店嘅「魔翼」都好受歡迎。 近期非常人氣嘅鹹蛋乜乜乜，髀魔都有：黃金魔翼，即叫即炸。單骨雞翼唔止方便食，仲更易入味，啲「黃金」鋪滿晒喺隻雞翼到，好邪惡啊！
名古屋名物 世界の山ちゃん
唔係山賊手羽啊喂，呢隻係名古屋名物手羽先。其實都係雞翼咁解，如果掛住日本居酒屋嘅重口味雞翼同鋪頭嘅氣氛，嚟自當地連鎖店山ちゃん嘅夢幻雞翼絕對可以幫你解鄉愁。一啖生啤，一啖雞翼，好好味嘅呢！
抵食之選 豪園小食美食車
雖然豪園小食園同豪園麵家主打唔同，但小食都做得幾出色。炸一字雞翼都係大家嘅必叫之選。就算切開咗做單骨雞翼，依然睇得出仲好肥嘟嘟，好有肉。仲有三款口味：原味、蒜醬豉油同芝士。
茶餐廳瑞士汁冇得輸 祥發茶餐小廚
你以為茶餐廳冇雞翼專門店咁好食？咁就錯啦，呢到雖然好似一間尋常嘅茶餐廳，但其實一到食飯時間就大排長龍。唔少人特登嚟食佢嘅瑞士雞翼同雞髀㗎。見到啲汁就想加個丁麵撈嚟食，嗚啊。
文：Yanny