近期開咗好多間石燒牛扒店，其中有兩間仲迅速打入咗7月嘅十強名單，到底香港嘅牛魔王力量有幾大？呢股熱潮又可以維持幾耐呢？BTW，今個月嘅10強中，有8間餐廳都係首次上榜，作為飲食界一員，實圶樂見有咁多新力軍啊。
第10位 阿里郎熱狗棒（*新上榜）
圖：深受各位泡菜仔女歡迎嘅韓式熱狗嚟到香港，旋即打入十大一啲都唔出奇。呢間熱狗連鎖店本身喺韓國都有超過80間分店，香港店則有8款口味選擇，當中梗係唔少得芝士拉絲系列啦。熱狗包炸得金黃酥脆，入面條腸又有肉汁，仲可以自由揀醬，係吸引嘅。
第9位 FAMA（*新上榜）
圖：food_enthusiasthk、AgnesAu6999
位於大埔嘅工廈餐廳，行田園風格，一入去就有個靚靚綠林打卡位，仲有幾部夾公仔機過下手癮，未食嘢但環境分已經加咗唔少。推介巨型鹹豬手配蕃薯條，外脆內軟啊。而呢度嘅飲品更加係呃like首選，好似Orange& Peach咁，成支反轉雪糕筒插咗喺度，好吸睛。
第8位 雞翼山（*新上榜）
圖：mandymanlovefoodie、adang82027
雞翼山呢間雞翼專門店，多間分店都分別多次上榜，今次就輪到銅鑼灣呢間終於都爭返啖氣。特別介紹下新口味嘅菠蘿油王子，先用牛油炒香雞翼後，再加自家製嘅菠蘿油脆脆，鹹香中帶甜。舖頭另外仲有多款港式風味雞翼，好似檸茶同鹹檸七咁，夠 晒local！
第7位 牛極（*新上榜）
圖：呢期好興石燒牛扒餐廳，旺角呢間能夠喺芸芸眾多店中突出，相信夠平係原因之一，180g嘅牛肩肉眼油脂分佈平均，肉味又香濃，都只係需要$78就食到。牛扒由師傅以自家製和牛牛油煎至約1成熟，就會放上火山石板交由客人繼續自己燒，唔怪得咁juicy啦。
第6位 快樂小羊火鍋餐廳（*新上榜） 
圖：餐廳只選用天然牧場放養嘅6個月大幼羊，並以老雞、牛棒骨等36種配料熬製成湯底，陣陣羊肉鮮香。想食到羊肉原味嘅話記住唔好點醬啊。黃金羊王、蒙式烤羊都係推介之選。
第5位 hEat（*新上榜）
圖：香港少見嘅地中海菜餐廳，以炭烤爐高溫快速炭燒嚟帶出食材原汁原味，特別推介肉眼扒畀各大牛魔王，有熟成30日或45 日嘅，肉味濃郁，仲要好鬼juicy。至於海鮮控就要試皇帝蟹喇，肉質鮮甜爽口，仲有陣陣炭香味添。
第4位 美滋鍋（*新上榜）
圖：7月盛夏都無阻大家打邊爐嘅決心，不過呢間嚟自新加坡嘅火鍋店有別於一般嘅舖頭，事關佢哋主打養生美顏湯底呀！以以瑤柱、雞肉、雞腳、豬手豬骨等熬製超過8個鐘嘅湯底啱晒貪靚嘅女生，清甜呢。就算係麻辣湯底一樣係健康版，加入咗唔少中藥去製作㗎。
第3位 磊犇（*新上榜）
圖：新上榜就入三甲嘅，又係一間石燒牛扒餐廳，價錢親民，白飯任裝，沙律同湯等都係飲嗶，餐廳仲會提供圍裙，等各位論盡豬仔唔會濺污糟件衫。三款牛，三款size，三款醬汁選擇，西冷扒油花最多，肉味最香；牛肩肉質軟腍；磊牛扒則較有嚼勁，牛魔王自己揀心水啦。
第2位 Mamaday
圖： 上個月第7位嘅小店，今個月躍升至第2位，佢哋個求求其其蒲燒鰻魚蛋包飯實情一啲都唔求其，原條鰻魚啊！加入牛奶炒成嘅蛋好滑，成碟飯好香口。多款甜品亦都相當有誠意，推介天然紫薯蛋糕，軟滑香甜。
第1位 為食龍
圖：榜首嘅創意壽司店，上個月排第6位。餐廳以恐龍做主題，8款口味嘅腐皮壽司，刻意比日本口味減低咗甜度，多種新鮮配搭比想像中match，冇負皮。另外，呢度仲有日式飯糰，食得辣嘅朋友仔不妨試下川味辣雞飯糰飯糰啊。
文：Kar