尖沙咀最近新開嘅拉麵店，以日系Kidult風為主題，店內周圍都有貓貓嘅影蹤，原來係Mirror成員江𤒹生（AK）嘅哥哥同一班好朋友一齊開嘅，手繪壁畫上嘅7隻貓更係佢哋家中嘅7位主子。餐廳主打京都風濃厚豚骨湯同雞白湯拉麵，仲有季節限定拉麵添。

豚骨湯同雞白湯兩款湯底均以長時間熬煮，濃厚稠身；麵底屬粗身麵，由日本直送到店，彈牙掛湯。最特別係改用時下日本最流行嘅低溫慢煮叉燒，以取代傳統嘅日式叉燒，口感更加鬆軟。

 開放式廚房設計，客人可觀賞師傅製作拉麵過程

 季節限定：葡式檸檬蜆貝拉麵

首先介紹季節限定拉麵——日葡 Fusion「葡式檸檬蜆貝拉麵」。檸檬係切細角上。好少會見檸檬同拉麵搭上，但加埋咗9.5%酒精嘅葡萄牙青酒 Vinho Verde同牛油，則令蜆貝嘅鮮味更突出，不過亦帶有輕微嘅檸檬澀酸。感覺小清新，好啱秋夏時分。每日限量30碗咋留意返。

 濃厚醬油豚骨湯拉麵 配 慢煮豚肉叉燒 ︳溏心蛋仲印有貓貓足印，咁cute得唔得架？

 濃厚醬油雞白湯拉麵 配 慢煮雞肉叉燒

每日每款限售60碗嘅常設款系中，以「日暮拉麵」同「日和拉麵 」作主打，前者係濃厚醬油豚骨湯拉麵 配 慢煮豚肉叉燒，呢個味自慢豚骨湯底，係用咗超過5個鐘去熬煮架。加埋秘製甘味醬油提鮮，口感勁thick，係咁多款式中味道最濃嘅一款；後者則係濃厚醬油雞白湯拉麵 配 慢煮雞肉叉燒，慢火熬煮嘅雞白湯，骨膠原出晒嚟，鮮甜香口。

 可加配炒飯

介紹多個食法畀大家，食完拉麵後加多碗和風豚雞叉燒迷你炒飯，然後倒入剩餘嘅湯底中撈勻，變成湯拌飯咁食，日本人都好鍾意咁食架。飯粒索晒湯底精華，並自帶黑椒香味，尤其配搭濃稠嘅豚骨湯底最為合適。

 (左)鮮蝦精華熬成嘅櫻花蝦味噌湯拉麵、(右)黑松露蜆貝醬油湯拉麵

另外，「赤雲拉麵」則係採用近期日本店流行嘅「雙湯頭」製法，結合豚骨同鮮蝦精華熬成嘅櫻花蝦味噌湯拉麵 配 慢煮豚肉叉燒，湯底蝦味突出，btw，唔使見到赤雲個名就驚咗先，辛辣程度輕微，最有趣係仲會有埋雲吞呢。至於「琥珀拉麵」，係以新鮮蜆貝熬湯嘅黑松露蜆貝醬油湯拉麵 配 慢煮豚肉‧雞肉叉燒，湯底呈琥珀色，未食就已經聞到松露散出嘅香氣，但就有少少蓋過咗蜆本身嘅鮮味。

餐廳Menu選擇唔算好多，拉麵以外就只有幾款小食。包括柑橘果凍唐揚炸雞、天婦羅無骨雞翼同羽根燒餃子。炸雞可以話係必試item，特別在於個醬，接近液態狀嘅柑橘果凍，更有絲絲果皮，酸甜清爽，有助中和油膩感，好fresh。

生粉們應該都知AK特別熱衷於日本漫畫同動畫，仲好愛錫貓貓，哥哥今次開店，可以話係圓滿咗AK嘅兒時夢想，而且餐廳更聯同兩間救助浪浪嘅機構*舉行為期2星期嘅籌款活動，惠顧時出示捐款紀錄即可獲贈日本特色無酒精飲品。

*志永儍瓜儍狗特工隊基地及沙律貓狗之家MCCC
 （活動日期：即日至9月17日）

日暮家 麵匠
地址: 尖沙咀宜昌街4號漢光大廈地下D號舖

文：Kar
相：Sunny