拍拖二人世界仲去酒吧？實情香港有唔少坐得舒服又唔太嘈嘅天台酒吧，最緊要係無論位於戶外定樓頂，都附送超靚浪漫夜景！最啱兩個人摸住酒杯底傾下計談下心......無男朋友？同姐妹一齊嚟亦得啫，嘻嘻。
尖沙咀嘅綠洲 Vibes
圖：Yan~*
位於尖沙咀區一間酒店嘅五樓，園林格局加熱帶土著彩繪，Relax得嚟又有活力。小食同Cocktails亦有唔少熱帶風情嘅選擇。鐘意熱鬧啲嘅話，可以留意酒吧不定期會有駐場DJ表演，而逢星期四會有中東風情表演，可以睇到肚皮舞表演。
中環西日酒吧飲清酒 KOKO
圖：Yan~*
呢間中環酒吧由日本明星足球員中田英壽同拍檔開設，旨在推廣日本清酒文化。清酒種類夠多，有中田英壽親自參與嘅高級N純米大吟釀，亦有米香濃郁較易入口嘅選擇。食物選擇亦由適合配搭清酒嘅海鮮，到西式嘅番薯條同Pork Ribs均應有盡有。
銅鑼灣270°維港靚景 SKYE
喺銅鑼灣鬧市一樣有靚景！呢間摩登法國菜餐廳位於一間酒店27樓，半開放式酒吧坐擁270°無遮擋維港景致，加埋Stylish嘅弧形發光吧枱吧櫈，單係環境同氣氛就已經無得輸。調酒師更會即席喺各位面前調配多種Signature Cocktail。
更多【二人前指南】： |
沙田30樓遠眺馬場 LEVELthirty Lounge & Bar
圖：美食焚化爐
有情調又有靚景嘅酒吧並唔係港島九龍嘅專利，呢間酒店Lounge & Bar位於頂層30樓，180°嘅開揚露台可以畀各位飽覽沙田城門河同馬場嘅夜景。除咗各款紅白酒、香檳同Cocktail之外，亦有唔同中西Tapas。逢星期二仲有豪飲「蠔」食推廣，可以任食生蠔同鮮蠔菜式！
黃竹坑唯一天台酒吧 Above
港鐵南港島線開通之後，就多咗唔少人嚟呢度「搵食」。想喺呢邊搵一間有靚景嘅酒吧，當然首推呢間黃竹坑區獨有嘅天台酒吧！可以遠眺海洋公園同港島南區山景，日景夜景各有優雅之處。除咗自家設計嘅Cocktail，酒吧仲有本地啤酒廠嘅出品，值得支持。
中環旺中帶靜談心酒吧 Armani/Privé
呢間酒吧位於中環置地廣場，方便喺附近返工嘅朋友仔嚟Happy Hour。酒吧以紅黑兩款顏色做主調，而且亦會有DJ打碟。想景少少傾計就可以出平台，雖然望出去係大樓景色，但勝在環境舒適而且唔會太嘈，嗌返杯特色Cocktail就可以Chill返晚。
文：Cathy