Line Friends粉呀，你哋咪成日葡萄韓國呀台灣呀嗰啲有Line Friends主題餐廳嘅，而家畀你哋恨到，香港都有喇。係就係遠咗少少，喺香港機場，仲要禁區內，首先你要......有張機票。

未有機票都唔緊要嘅，睇住環境同嘢食止住渴先。門口有大大個熊大，拎住個burger嚟歡迎各位粉絲。舖頭入面莎利、Cony等等嘅打卡位都有。

餐廳主要提供西式同韓式嘢食，當中要數最吸睛嘅應該就係熊大同Cony造型嘅熱香餅喇，配多條焦糖香蕉同沙律，不過就暫時只係早餐時段先有（遲下會加入全日menu喎應該）。

Bite漢堡可以話係餐廳嘅招牌菜，總共有9款漢堡，配搭傳統韓式醬汁，burger面仲有佢哋個嘜頭添。香脆雞扒漢堡都真係幾脆，入口微辣帶甜。

 炸蝦餅漢堡配炸薯條、烤豬肉漢堡配炸薯條

而BITE & BITE 拼盤就可以任揀兩款漢堡，加埋薯條同雞翼，些牙食啱晒。

而Line Friends 拼盤就有炸洋蔥圈、珍寶香腸、雞翼同炸薯條。

想食飽飽先上機嘅話，有7款飯選擇，例如烤豬肉配飯。同漢堡一樣，都係配特製韓式醬汁。

仲有甜品同雪糕添，不過雪糕味道選擇就唔多，得雲呢嗱同朱古力。

特飲有山竹特飲、荔枝熱情果特飲等，前者甜中帶酸，後者則帶有果香。

另外仲有一系列旅遊用品、生活、文具、毛公仔同其他精品，全部都好cute cute，如果出境去探朋友，買嚟送畀佢哋都ok。

不過餐廳位於201-230閘口嗰頭。入咗閘之後都仲要搭架無人駕駛列車先到，係有少少遠啊。如果有心去探本命同打卡嘅粉絲，一嚟記得要預早啲去，二嚟一路影一路食仲要記得一路睇錶呀，掛住打卡趕唔到飛機就熊大都幫你唔到喇。

BITE&BITE with LINE FRIENDS
地址：赤鱲角暢達路1號香港國際機場機場客運大樓 (禁區) 中場客運廊7樓7MC200及7MC214號舖

文：Kar
相、片：Tom Li