呢間位於中環Soho區嘅樓上咖啡店年初試業已經大受歡迎，唔單止因為老闆曾奪兩屆香港咖啡師大賽冠軍，亦因為有特大玻璃窗，感覺更開揚而且可以一覽繁華街景。餐廳最近新增晚餐同雞尾酒，選擇多元化得嚟又有水準！
 

Doubleshot by Cupping Room糅合美食、咖啡、酒吧概念，最近正式開業，每晚6點後供應晚餐。另一方面，雞尾酒由曾任職世界最佳酒吧PDT New York嘅Chanel Adams設計，更加入環保唔浪費嘅元素。
 

Boston Lobster "Bomba" Rice（$488）

餐廳推介之一，原隻波士頓龍蝦分量十足，肉質鮮甜彈牙。而西班牙短米用餐廳自家製海鮮湯熬煮之後吸滿精華，一上枱就聞到海鮮香氣。飯粒濕度適中，飯心帶硬特別有嚼勁。
 

Hand Cut Beef Tartare "four ways"（$168）

適合開心Share嘅前菜，選用意大利牛肉手切成牛肉他他，口感柔滑同時保留少少一粒粒嘅咬口。盒裡面仲有醃漬⼩⿈⽠、紅蔥、⻄班⽛⼩紅椒，同油封處理過嘅⽇本蛋⿈，可以按喜好自由配搭，配煙韌嘅麵包一齊食。
 

 

MFC(Miguel's Fried Chicken)（$168）

春雞用白脫牛奶浸過夜再炸，所以食落有奶香，加上香料嘅辛香味同雞肉嘅肉汁，皮脆肉嫩而且夠晒惹味。點埋餐廳調配嘅辣醬，辣中帶酸更醒胃。配搭凉拌紫椰菜，中和炸雞嘅油膩感。
 

（左）T-ball（$128），（右）Spent Martini（$118）

招牌雞尾酒Spent Martini糅合環保元素，例如用分店用剩嘅杏仁牛角包浸酒，沖過咖啡嘅咖啡粉加冧酒製作coffee liqueur，亦加入單品豆Anasora Samii嘅espresso同伏特加，入口順滑、富有咖啡香。

而T-ball就以Highball為靈感，加入柚子蜜、打入氣泡嘅冷泡鐵觀音配搭威士忌。秉承唔浪費嘅原則，沖過柚子蜜嘅果皮烘乾後作為點綴，令柚子清香更突出，味道清新容易入口。
 

Doubleshot by Cupping Room
地址：中環蘇豪荷李活道49號鴻豐商業中心1樓

文：Cathy
相、片：Tom Li