平時去Coffee Shop飲咖啡就飲得多，有無諗過係舖頭入面學點沖咖啡？今次星巴克咖啡位於東亞樓嘅新分店就特設咖啡工作坊，大家可以同咖啡大師交流，一邊學唔同嘅咖啡知識，一邊飲下自己沖出嚟嘅咖啡！
 

灣仔東亞樓新分店樓高三層，一樓係Coffee Shop，特別在有吧枱畀咖啡師喺大家面前以手沖方式調配專屬於你嘅咖啡。
 

而三樓就係舉辦咖啡工作坊嘅地點，工作坊由星巴克嘅Coffee Master教授，暫時有Make your own latte咖啡拉花同Hand brewing手沖咖啡兩個工作坊。
 

就算係咖啡新手都唔需要擔心，工作坊唔單止有齊咖啡豆同需要嘅用具，有任何問題亦可以隨時問Coffee Master，佢地亦樂意同大家分享唔同嘅咖啡心得。
 

好似咖啡拉花工作坊咁，由磨豆、沖咖啡、打奶泡到拉花，每個步驟都有技巧。例如想拉花圖案細緻得嚟又夠持久可以影耐啲相，牛奶就一定要打得夠幼滑。想知更多貼士？當然要靠你自己嚟工作坊學啦！
 

開飯仔都親自試咗一杯，相信大家應該都估唔到，其實本來開飯仔係想拉個心形嘅......學Coffee Master話齋，要拉花拉得靚睇嚟都係要多多練習嘅呢。
 

而手沖咖啡工作坊最啱對唔同咖啡風味有興趣嘅你，可以選擇唔同產地唔同特色嘅咖啡豆，然後學習手沖、Chemex咖啡壺同虹吸嘅沖調方法。平時睇咖啡師搞下搞下好似幾容易咁，其實由一張濾紙嘅選擇，到溫度、時間同分量控制都要非常準確，先可以帶出咖啡豆嘅真味。
 

而且就算用同一款咖啡豆，用唔同方法手沖嘅話，味道同口感都會有啲唔同。例如用Chemex咖啡壺沖調速度比一般手沖方式慢，但同時沖出嚟嘅咖啡亦會無咁酸。不妨睇下喺工作坊會唔會搵到你心目中咖啡店同沖調方法嘅Perfect Match。
 

而且參加工作坊可以到地下參觀星巴克咖啡嘅展覽，從種植、品種、特色、採購等方向了解到更多有關咖啡豆嘅知識。一邊仲展示咗120隻由香港、澳門、越南等地星巴克分店職員繪畫嘅咖啡杯，係一大Selfie位！
 

咖啡工作坊將會喺8月17號開始接受網上報名，暫時由Starbucks Rewards™會員優先體驗，稍後再開放畀公眾參加。逢星期四或五夜晚舉行，參加工作坊仲會得到特別版圍裙、Tote bag同咖啡勺。無論你係Coffee Lover定Starbucks Fans都值得留意。
 

星巴克咖啡
地址：灣仔軒尼詩道23-29號東亞樓地下至二樓

文、相、片：Cathy