呢間美國過嚟嘅芝士蛋糕店，本身個menu已經多到嚇親選擇困難症嘅朋友，但，沒有最多，只有更多。佢哋嚟緊17號開始又出新嘢喇，4鹹2甜。

手掌咁大隻嘅松露蜜糖炸雞，仲要有兩隻咁多，加埋大大份薯蓉喺中間，想唔飽都幾難。但係松露味突出，皮又炸到香脆，滲埋啲蜜糖味出嚟，甜甜地又香香地，好難抵抗。

烤紐約牛扒都唔禮讓，10安士㗎有，都juicy嘅。Lunch廚嚟鋸下扒都幾爽。

同樣都係大大份嘅仲有墨西哥早餐卷，不過又唔係淨係早餐先食得嘅，晚餐都得。墨西哥薄餅中間包住炒蛋、煙肉、牛油果、芝士……勁多料呀，淋埋蕃茄洋蔥醬，就咁食都好開胃，蛋香味濃。當然想再豐富啲，就可以點埋sour cream、莎莎醬或者黑豆啦。

呢道菜你真係估佢唔到，就咁睇暗紅色一粒粒，以為係炸雞，點知原來係拌上韓式風味甜辣醬嘅韓式炸椰菜花嚟，莫講話睇唔出，其實食落，都唔太食得出係椰菜花，啲汁醬嘅味略嫌太搶。

至於甜品方面，新出咗兩款cheesecake，分別係至尊咖啡忌廉朱古力同朱古力榛子脆脆。前者係朱古力蛋糕底，數上佢係以冷萃咖啡製嘅cheesecake、咖啡馬斯卡邦芝士慕斯，咖啡味香醇。

但甜品怪一定會鍾意朱古力榛子脆脆多啲，佢係brownie餅底，然後有層榛子脆粒，卜卜口感唔錯，on top 加cheesecake之後再嚟一層Nutella醬，甜得嚟係會暗爽。

同場加映兩款萬聖節限定嘅南瓜cheesecake：南瓜芝士蛋糕同南瓜山合桃芝士蛋糕。

講多句，怕等位嘅朋友，而家有得預約訂位喇，不過有時間限制，只係係得平日早上嘅11-12點，同下晝3-5點可以卜位，要返工嘅打工仔，這些機會……

The Cheesecake Factory
地址：尖沙咀廣東道25號海港城港威商場地下G102號舖

文、相：Kar