蓬萊咖哩屋

營業中

休息中

上年聖誕食完後念念不忘，一直都好想再嚟食。趁住今日冬至，一於食晚餐做個冬。照舊都係叫咗個二人餐（$318，另收加一，但上年攞咗張VIP卡，有85折，埋單$303）前菜，二片脆脆薄餅，微辣香口，青色醬清爽，醃洋蔥醃紅蘿蔔開胃。餐湯/咖喱角，要哂咖哩角，外層鬆化，入面咖哩薯蓉惹味。清炒時菜，食到不少香料味，但今次油咗啲啲。咖哩雞/牛/羊，揀咗羊肉（小辣），咖哩辣甜酸，多重層次；羊肉炆得好腍，冇乜羊騷味。蒜蓉燒餅，即烤，熱辣辣，蒜蓉味唔重，用嚟點咖哩一齊食冇得輸。印度黃飯，長條米粒，乾身，又係啱哂撈咖哩一齊食。串烤五香雞件，鐵板上，勁惹味，醃製醬汁少少辣，雞件烤得超好，表面稍稍焦香，裡面雞肉嫩滑而且仲有肉汁，另外墊底嘅洋蔥絲、椰菜絲、紅蘿蔔絲，吸哂味。正。餐飲，嘉士伯啤酒，爽爆。

餐廳提供不同人數嘅預設套餐，我就揀咗二人餐（$318+10%）。餐前送咗兩片脆片，青色醬十分清爽，醃紅蘿蔔、醃洋蔥酸酸哋好開胃。餐湯（雞肉忌廉湯，濃度適中，味道不錯）、咖哩角（熱辣辣，外面鬆脆，裡面咖哩薯蓉香味重）各要咗一份。羊肉咖哩，要咗微辣，咖哩香味重，而且有蕃茄底，甜甜辣辣，多重口感；羊肉大約有五/六件，有羊騷味但唔重，肉炆得好淋，而且唔肥，好食。蒜蓉燒餅，熱辣辣（辣手），蒜味唔太重，點咖哩一齊食冇得輸。串烤五香雞件，即叫即做，鐵板上，雞件外面香口、內裡有肉汁，醬料醃味好惹味；連埋鐵板底嘅洋蔥、椰菜絲、紅蘿蔔絲都勁入味，正。清炒時菜，用咗不少香料炒，好惹味。印度黃飯，米粒長，乾身，撈咖哩啱哂。餐飲要咗2杯啤酒，跑完啤一啤，爽爆。呢餐食得超滿足，食物質素又好，價錢又合理，絕對值得推薦。

又要係元朗搵野食，大王提意呢道，好有歷史既印度咖哩。起初大王驚間鋪太舊會好污漕，但坐低又唔覺，都OK光猛。跟佢貼起蔡蘭張poster叫咗個濃腰果汁牛肉，燒鷄翼、泥泊爾餃子再加印度黃飯。先黎既係黑糊椒薄餅+酸洋葱醬+薄荷醬，同外間既餅一樣﹐香脆又有黑糊椒味，大王特別歡喜酸洋葱醬，直頭就咁食啲洋葱添。濃腰果汁牛肉，只有少少辣，比想像中温和，但都好濃味，配上印度黃飯就好好味。泥泊爾餃子，餃子普通，但係附上既辣醬就好好味，餃子再加上辣醬，真係好正!!!最有驚喜既係鐵板燒鷄翼，熱辣辣咁上，有炭燒既氣味，微辣，係近期既佳作!!!!埋單$210, 幾抵食，會同大王再黎食!!!跟住買埋生果返屋企睇大結局…….