影片
更多
2014-02-08
1114 瀏覽
家住九龍東嘅我，偶爾都會專程黎東大街搵好野食。雖然東大街位置係正地鐵站隔離，交通非常方便，不過要專程搭車黎較為偏遠嘅港島東幫襯，餐廳一定要有翻咁上下水準。加上東大街神級餐廳如XX咖哩，XX魚蛋粉麵基本上係唔少食客黎東大街嘅必到景點，民聲冰室作為一間家主打家常便飯嘅港式茶餐廳，要吸引食客幫襯真係唔簡單。今日係大年初四，東大街有一半食肆仲未開爐，令開左門嘅食肆生意大增。見民聲冰室唔係太多人等，就決定試下。先講下餐廳環境：鮮橙色嘅門面非常搶眼，整間餐廳感覺光猛而且衛生清潔，檯燈亦都夠大，唔係卡座嘅座椅都係有cushion 嘅小型沙發凳，以冰室黎講算係非常舒適。不過，餐廳嘅設計就非常奇怪。首先，餐廳大門係凹左入去嘅，門外有個唔細嘅地方放擺設同餐牌，隔離仲有一千零一張餐檯，對住東大街馬路@@ 呢種設計係適合海邊餐廳或者酒吧，不過對於一間港式茶餐廳就非常格格不入。如果係我，就唔想一路食住馬路d塵，一路食肉餅。我哋張台係冰室盡頭，要行上半層樓梯嘅小平台上面。以為餐廳門面已經夠奇怪，原來沒有最奇怪，只有更奇怪。我哋坐張台隔離有兩個玻璃箱，裡面養左隻蜥蜴@@ 我認同係食肆養下金魚之類當風水擺設係無可口非
今日係大年初四，東大街有一半食肆仲未開爐，令開左門嘅食肆生意大增。見民聲冰室唔係太多人等，就決定試下。
先講下餐廳環境：
鮮橙色嘅門面非常搶眼，整間餐廳感覺光猛而且衛生清潔，檯燈亦都夠大，唔係卡座嘅座椅都係有cushion 嘅小型沙發凳，以冰室黎講算係非常舒適。
不過，餐廳嘅設計就非常奇怪。首先，餐廳大門係凹左入去嘅，門外有個唔細嘅地方放擺設同餐牌，隔離仲有一千零一張餐檯，對住東大街馬路@@ 呢種設計係適合海邊餐廳或者酒吧，不過對於一間港式茶餐廳就非常格格不入。如果係我，就唔想一路食住馬路d塵，一路食肉餅。
我哋張台係冰室盡頭，要行上半層樓梯嘅小平台上面。以為餐廳門面已經夠奇怪，原來沒有最奇怪，只有更奇怪。我哋坐張台隔離有兩個玻璃箱，裡面養左隻蜥蜴@@ 我認同係食肆養下金魚之類當風水擺設係無可口非，不過將動物放係進餐區，仲要係未必所有人接受倒嘅蜥蜴，真係唔太妥當。
再講下冰室嘅服務質素：成間冰室有起碼十幾台客，我眼見只有兩個樓面，不過佢地做野好快手，完全唔洗等，非常抵讚。不過，樓面嘅態度貫徹左冰室奇怪嘅特質 @@。話說我爸爸架車拍左係冰室門口，落單後同樓面呀哥講，如果你地見倒出面有警察抄牌，就話聲我哋聽呀唔該。樓面呀哥嘅反應係，quote “係度比人抄都抵啦。" 雖然佢唔係唔禮貌，不過我同屋企人都聽唔明呢句有mud 意思，反正就係奇奇怪怪咁。
到d野食：
四個人叫左四個小菜。呢度無小菜套餐呢回事，另外加飯要 +$8 碗。
首先梗係要睇下招牌菜：鹹蛋蒸肉餅山
呢度嘅鹹蛋蒸肉餅山係我食過最好味嘅蒸肉餅！原本以為肉餅山咁厚，要蒸熟反而會令肉質變乾，但事實剛好相反。可能因為肥膏/肉嘅比例十分高 (保守估計可能有 1:1) ，所以肉餅雖然厚，但係就十分 juicy。更神奇嘅係，雖然食得出肉餅含肥量好高，但係咬落去並無滲油情況，口感juicy 得黎又唔會成口油，贊！肉餅上面有粒圓圓嘅鹹蛋黃，非常甘香而且唔會油膩。肉餅山成為鎮店之寶係實至名歸。
到第二好味嘅口水雞除左肉餅山之外，門口貼嘅雜誌仲有推介口水雞。碟雞一上台，就聞倒好香嘅醬料香味。賣相方面，雞件上鋪滿左厚厚嘅醬料，仲有皮蛋做伴碟，十分吸引。味道方面，呢度嘅口水雞香係夠香，不過幾乎唔辣，好麻辣嘅朋友恐怕會失望。可能係禽流感肆虐嘅關係，為左令食客安心，呢度嘅雞煮得幾熟，不過肉質亦未至於好鞋。不過d皮蛋就麻麻喇，皮蛋雖然係溏心，不過完全唔入味，嗮曬d醬料。
欖菜肉鬆四季豆味道唔錯，唔會太鹹。不過碟豆d配料嘅比例又好奇怪。全碟豆得一千零一隻菇，而且係一隻十分巨型嘅菇@@ 係下面張相度都睇倒，比例上搶曬鏡。d 蒜頭全粒上，貪得意一咬落去辣到飛起，如果去剁碎佢會好d。另外d欖菜如果多d會再香d。
最後到瑤柱蒸水蛋我明白蒸水蛋係睇落容易，實情係非常考功夫嘅一味餸。不過民聲嘅瑤柱蒸水蛋實在平庸得令人有d失望。賣相方面蒸水蛋表面蒸得平滑，並無凹凸不平嘅氣孔。不過，可能水落得太少，一咬落去水蛋比較實，亦唔係十分滑。細心d睇，水蛋上下分左兩層，面果層薄薄的只有大概5mm。原來只有上面果層有瑤柱，令你係上面睇瑤柱好似好多咁，其實係上面果滲先有@@ 所以下面果層厚厚嘅水蛋完全無瑤柱嘅口感！雖然我比$55蚊唔算好貴，但係你都唔洗咁小家架... 亦都係因為咁，小編第一次比一味餸唔及格嘅分數。
總括黎講，民聲冰室係獨孤一味靠肉餅。無錯肉餅山真係神級之作，不過一間茶記最重要嘅平均水準佢係無嘅。其他餸水準平平實在令人失望。加上晚市又無客飯套餐，價錢唔平，好難係東大街呢個 big pond 度有一番作為。下次會再幫襯的話，可能都係單點肉餅算。
張貼
