Le Marron (已結業)

呢間係一間隱世嘅法國餐廳，點解？你上到來你就知，至少門口冇公司名。 但係一踏入這道大門口你就會發覺佢係一間非常有心嘅法國餐廳。 呢間餐廳喺銅鑼灣怡和街叫做Le Marron。首先我哋叫咗一打法國生蠔Fine de Claire and Normandy。 海水味濃而肉質鮮滑好有質感。我哋真正嘅頭盤就係無花果煎鵝肝。 鵝肝皮脆內嫩加埋佢哋嘅黑醋汁沙律， 好味。其後就係佢哋嘅法式洋蔥湯， 本人就覺得有小許過甜。但係見到佢哋用料十足， 依碗洋蔥湯又真係好用心去做。食完兩味餸之後， 就係佢哋嘅雪葩。 味道好淡而個樣好似一個乒乓波，但係擺落口裏面真係可以將所有食物味道溶化， 準備下一道菜。羊架是今晚嘅重頭戲。肉質鮮嫩多汁， 加上喺羊架上嘅鬆脆麵包糠， 口感好複雜， 又滑又有口 。好好味!我的甜品是芒果拿破崙。 皮脆芒果甜。 當擺入口嘅感覺，真係好百感交集，好有深度。呢間餐廳我一定會再嚟。價格中下但係品質中上，超值嘅餐廳。。。

朋友介紹試試樓上鋪法式餐廳，響怡和街，地點方便，在商業大廈12/F,入到餐廳，充滿法國情懷，帶點家的溫馨感覺，入到裡面，間格獨特，以一格格間房為主，望到有半透明既玻璃夾板作間牆，相信可自由組合大細房，供一班人或細形枱組合皆可，可自選privacy，環境有啲似法國古堡，充滿古典風格。先上餐包，一籃上面有不同品種選擇，有軟有硬包，還有脆條狀餅乾，適合不同人的口味。前菜係名貴厚切香煎鵝肝，呢隻鵝肝好爽口，不像平時常吃入口即溶那種，下面墊住煎香的焦糖蘋果圈，一起吃下能中和肥膩口感。餐湯叫了洋蔥湯，好驚喜，面層唔似酥皮，一層厚厚的原來係煙韌芝士配麵包，將佢放入洋蔥湯內，等芝士慢慢溶，有趙口，香味濃郁。新穎烹調。之後食青檸雪葩清一清味蕾，一小粒凍冰冰，好清新。到主菜，白汁焗龍蝦，啖啖肉，鮮甜彈牙，配菜有多款雜菜，包括椰菜仔，豆，甘荀同薯蓉。最後到甜品心太軟，朱古力溶漿流出，不會太甜，蛋糕軟淋淋，最開心係個呍喱拿籽雪糕，呍喱拿味道超濃郁，香甜滑溜奶味重，同外間的好不同。