糖佰府 (已結業)

喺九龍城食完泰國嘢，搵間糖水食都花多眼亂，太多選擇，搵咗間個名幾搞嘢叫糖佰府嘅甜品鋪。鋪位座位唔算多，牆上面貼咗好多明星相。佢地仲強調糖佰府並非糖百府。餐牌都多選擇，無論係傳統定新派甜品都有。叫咗三款食，第一款小弟至愛 cream brûlée。估唔到糖水鋪都做到咁高質嘅cream brûlée，塊焦糖脆而有質感，能與出面d餐廳比一日之長短。第二款，叫咗白雪世界，主要有芒果、西米、小丸子、爆冰，味道清新。如果鐘意食雪糕嘅，第三款不能不試 - 雪糕紅頭芋圓涼粉。芋圓都係小弟其中一款喜愛甜品，非常足料，再配以雪糕（有多種口味選擇），消暑一流。總結：睇得出係有心做好甜品嘅小店，值得支持！

九龍城除左泰國菜最多就係甜品，糖伯府係咁多間糖水鋪之中都幾出名今晚大概8點幾黎到，時間尚早 所以唔太多人。入到黎坐低就見到兩邊牆貼滿左老闆同明星既合照今次嗌左兩款甜品，第一款係cream brûlée ，焦糖燒得香脆，下面燉蛋好creamy，又有甜甜既蛋香，令人一口接一口第二款係芋圓，自由搭配左涼粉底加綠茶雪糕。自家制既芋圓粒粒都好煙韌，比起坊間一啲主打芋圓既糖水鋪仲要好食！芋圓同涼粉本身做得唔太甜，所以加埋綠茶雪糕甜度岩岩好！

0係九龍城食糖水，心入面都係果幾個選擇。點知今日行行下，竟然比我發現另一間唔多起眼既小店。我同朋友仔都比店入面特別既環境吸引左入去，店內既格調好清新好繽紛。牆都係以鮮色為主，貼滿左好多甜品既相片。我地坐低後一睇餐牌，價錢令我地好驚喜。雖然座落旺區，但價錢係小區街坊價，而且選擇唔少。我地四個人，但係叫左五樣野食，每人一碗加一個綿花冰。《法式燉蛋》我唔想食凍野，揀左法式燉蛋。上枱時熱辣辣，好香！輕輕篤落去，面頭有少少焦糖，燒得好脆好成功。試一啖燉蛋，好滑好creamy，口感一流。味道方面，有好香濃既蛋香，少少甜，仲有少少香油味，味道豐富有層次。《椰汁冰紅豆芋圓西米》啊妹不嬲鍾意食芋圓，去親台灣都食唔停。香港唔多地方有得食芋圓，佢一見到就好開心喇。呢度既芋圓好足料，有好多唔同既配料，一d都唔單一。試左一啖，芋圓好Q彈，西米爽滑，最特別係佢地配左少量椰汁冰，令到口感又多左一個層次。《番石榴綿花冰》綿花冰冰涼軟綿綿，但一定要快食，溶左又唔好食喇。番石榴味道突出，配料足，鍾意食冰野既話，算係唔錯既選擇。整體黎講，選擇多，用料足，味道唔錯，價錢非常相宜。服務環境都令人覺得舒服，值得一去。

今晚又黎到九龍城食甜品，經過糖佰府門口見冇人排隊，店務員又親切照呼，於是就入左去。我地兩個人，叫左三個甜品，蜜瓜椰汁西米露，楊枝金露都好一般，d生果無甜味，唔夠新鮮。最後上既係法式燉蛋，一見到個樣已經覺得好好味，事實上都係超級好味，d蕉糖好脆，厚蕉糖，唔似平時係其他地方食既只得薄薄一層蕉糖，仲有個d燉蛋好滑，口感好細軟，真係好正，係我食過最好味的燉蛋。本來唔會再幫襯，但為左呢個燉蛋，相信我會經常黎食。